Яй айлары бир куьндей болып оьтип бараятыр. Тек туьнегуьн элимиздинъ мектеблерин биткен ясларымыз эм кызларымыз тезден йогары окув ошакларынынъ капыларын ашпага аьзирлик коьредилер. Солардынъ ишинде – Азимова Наргиз Заурбек кызы (суьвретте).
Заурбек эм Авархан Азимовлар коьплеген йыллар Сургут каласында яшайдылар. Заурбек автобус айдавшысы болып ислейди, Авархан – балалар бавынынъ тербиялавшысы. Наргиз да кишкейлей калада оьсип келеятыр, ол быйыл Сургут каласынынъ 5-нши номерли мек-
тебин уьстинликли битирди. Сол окув йыллары кызга биринши класстан алып кызыклы эди. Тек кызыклы тувыл, неге десе Наргиз бу мектебте ийги билим алган. Мектебте болатаган баьри олимпиадаларда да катнасатаган эди билимли кызалак. 10-ншы класста Наргиз мектеб президенти этилинип сайланган. Ийги окув уьшин Наргиз федераллык эм региональлик дережели медальлерге тийисли болган. Наргиздинъ мырады толды – буьгуьнлерде ол Сургут патшалык университетининъ «лечебное дело» факультетининъ биринши кур-
сына туьскен. Билимли кызалак аьр дайым алдыда, онынъ йоллары ашык болсын аьр дайым деп йораймыз.