Ногай район орталыгында 15 йылга ювык заман «Россельхозбанк» акционерлик ямагатынынъ Дагестан регионаллык филиалынынъ Терекли-Мектебтеги косымша офиси ис аьрекетин бардырады. Офис ашылганнан алып соны бир кесек йыллар авылдасымыз Мадина Муса кызы Абдулалимова басшылады. Аьлиги заманда офисти яс ердесимиз Абдурахман Ильяс увылы Койлубаев етекшилейди. Янъыларда газетамыздынъ хабаршысы оны ман йолыгысып, хабарласув оьткерген.
– Абдурахман Ильяс увылы, аьлиги рынок катнасувлары шагында банклардынъ маьнелиги акында айтпага да керекпейди. Аьдемлер банк аркасы ман коьп буйымларын битиредилер. Офисинъиздинъ ис аьрекети акында не зат айтпага боларсыз?
– Ызгы йылларда бу банк офиси эндигиси район еринде калып турган ялгыз бир банк меканы болады. Бизим бас приоритетли борышларымыздынъ бириси – оьз клиентлеримизди олар бизге муьсиревли болгандай этип канагатлав эм олардынъ бизге сенимин аклав.
Мен банкта эки йылга ювык заман ислеймен. Былтыргы пандемия аьсеринде юмада тек 2 куьн ислегенимиз де болды. Сол куьнлерде бизге РФ Президентининъ социаллык тоьлевлерин бермеге туьсти, клиентлер коьплилигиннен заьлимдей авырлык та болып алды, тек биз аьр аьдемнинъ буйымын тийисли кепте толтырмага шалыстык.
– Офисте кайдай акша вкладлар салмага, пенсионерлерге, сакатларга кайдай льготалар этилинеди? Куьнде неше аьдемди канагатлайсыз?
Офисимиз банк аьрекетининъ баьри де йол-йорыклары бойынша куллыгын бардырады. Олай дегеним, кредитлер (потребительлер, пенсионлык, ипотекалык кредитлер) беруьвден алып, элимиздинъ туьрли ерлерине, шет эллерге дейим акша йиберуьвлерин канагатлаймыз. Буьгуьнлерде аьдемлер уьшин ол – бек керекли банк операцияларынынъ бириси.
Соны ман бирге бизим офисимизде кайсы бир аьдем де акшаларын сакламага салмага (вклад этпеге) болады. Айтпага, акша йыюв (накопительный вклад), пенсионлык вкладларына 3,6 проценттен 6 процентке дейим акша косылады. Сакат аьдемлерге кредитлер страховкасыз бериледи. Пенсионерлерге акционлы кредитин беремиз, ол йылга 7,5 процент болады. «Сбербанк» ПАО кредитлери йылга 15-16 процент болса, бизикилер – 7-9 процентлерге олтырады. Тек бизде кредит алаяткан аьдемнен страховка акшасы калдырылады. Мысалы, 100 мынъ маьнет акша кредит алган аьдем соны уьстиннен 7,5 проценти мен косып тоьлейди, страховка сол шаклы кредиттен 2 процент эсабында ысланып калдырылады. Кредитти тоьлевдинъ болжалы узын болган сайын, сол шаклы да страховка оьлшеми коьп ысланады.
Потребительлер кредити бюджетниклерге 8 проценттен алып бериледи.
Пенсионерлерге пенсионлык кредити 6,5 проценттен алып 8-9 процентлерге дейим бериледи.
Аьлиги заманларда кредит алув бек енъил болган. Сонынъ уьшин бир поручитель де эм коьп кагытлар керекпейди.
Пенсионерлер уьшин солай ок бизде «Пенсия картасы» бериледи. Ол бизим банкымыздынъ пенсиялар эм социаллык тоьлевлерин йиберуьв уьшин айырым алаты болады. Сол картады алган пенсионердинъ карта эсабында, эгер кериге акшасы калгандай болса, сога йыл узагында 6 процент косымша акша косылады. Соны ман бирге бизде «Россельхозбанк –АККОР» деген картады да алмага болады. Онынъ да коьп онъайлыклары бар.
Эндиги – вкладлар акында. Бизим банкта «Инвестиционлык» деген вклад пан, айтпага, 50 мынъ маьнеттен алып акшады аманатлап банкка саклавга бермеге боласыз. Сол акшанъыздынъ уьстине 180 куьннен 7 процент, бир йылдан 7,60 процент акша косылады.
Оннан баска болып, «Оьсетаган келим» деген вклад бойынша кайсы аьдем де 10 мынъ маьнеттен алып акшасын аманат кебинде банкка саклавга бермеге ыхтыяры бар. Сол акша оьлшемине 180 куьннен – 3,50 процент, бир йылга – 4 процент, эки йылга ювык заманга ашса, 5,50 процент келим косылады.
Куьн узагында офисимиз, орташа алганда, 110-120 аьдемлердинъ буйымларын канагатлайды. Йогарыда белгиленген буйымлардан оьзгелей, офисимиз налоглар, госпошлина, штрафлар эм сондай баска тоьлевлерди де алады.
– Коьп аьллерде биздеги банк карталары бар аьдемлерге акша шешуьв уьшин яде сиздеги яде район МФЦ янындагы «Сбербанк» банкоматларга ювырмага туьседи. Соларда да бирерде акша болмай калады. Сиз район орталыгында, баска уьйкен авыллар ишинде тагы бир неше банкоматлар салмага ойынъыз йок па?
– Биз быйыл оьзимиздинъ офисимиз алдындагы эки эскирген банкоматларды янъыларына авыстырдык. Терекли-Мектебтеги «Мир свежести» туькени ишине, оьз клиентлеримизге онъайлы болсын деп, банкомат ерлестирдик. Эндиги де сентябрь айынынъ ызына дейим «Россельхозбанктынъ» 3 банкоматларын орынластырмага ниетленемиз. Солардынъ биревин – Ногай ЦРБ ювыгындагы «Буйрат» туькени ишине, экиншисин – Карагас авылына эм уьшиншисин район орталыгындагы С.Батыров атындагы саниятлар мектебининъ ювыгында ерлестиреекпиз.
Бизге келетаган баьри де клиентлерге тегин эсапта онлайн-приложение этип беремиз.
– Сизинъ банкынъыз былтырдан алып авыл еринде яшайтаганларга ипотека кредитин берип баслаган эди. Сол кредит эм соны кайтип алмага болатаганы акында не зат айтарсыз?
– Былтыргы йылдынъ ортасында республикада да авыл ипотекасы деп аталган айырым программа яшавга киритилип басланды. «Россельхозбанк» энъ бириншилерден болып сондай ипотека кредитин беруьвге косылды. Кредиттинъ бу кеби авыл ишинде ер участогы ман уьй сатып алув, оьз ер участогында уьй курув яде ер участогын сатып алып, сонда уьй курылысын юритуьв уьшин бериледи. Авыл ипотека кредити аьли де 75 ясына толмаган аьдемге 25 йыл узагына 100 мынъ маьнеттен алып 5 миллион маьнет акшага дейим бериледи. Сондай кредитти алган инсан алган кредит оьлшемининъ уьстиннен йыллык 2,7 процентин тоьлейди, эгер страховкасы ман алса. Страховкасыз алган аьдем сондай кредиттинъ уьстиннен йыллык 3 процентин тоьлейди. Баслапкы взносын банкка кайтарганда, сатып алган уьй баасынынъ 10 процентин тоьлейди. Сондай кредитти сиз мораторийсиз эм комиссиясыз толы кебинде яде кесеклеп яппага боласыз. Кредитти ай сайын дифференцированлы яде аннуитетли тоьлевлер мен тоьлемеге ярайды.
Ипотека кредитти алув уьшин паспорт яде аьдемнинъ менлигин шайытлайтаган баска бир документ, 27 ясына толмаган эр киси аьскершилик билетин яде приписной шайытламасын, уьйленгени, балалары барлыгы акында, аьдемнинъ финанс аьлин эм не ис пен каьр шегетаганын шайытлайтаган документлер аькелмеге керегеди.
Сондай кредитти бизим офисимиз былтыр сентябрь айыннан алып берип баслаган. Быйыл тек бир июль айында биз район яшавшыларына 26 миллион маьнеттинъ ипотека кредитин бергенмиз. Сол шаклы кредит акшасы республика бойынша баска бир районда да берилмеген. Коьп дегени Махачкалада оьткен айда 17 миллион акшадынъ ипотека кредити берилген.
Офисимиз озган 2020-ншы йылдынъ ис сырагылары бойынша Дагестанда 3-нши орынды алган. Мага «Россельхозбанк» АО Дагестан филиалынынъ директоры Е.Гончаренко атыннан минсиз куллык эткеним уьшин Сый грамотасы тапшырылды.
– Эндиги ис коллективинъиз акында не зат айтпага боласыз?
– Бизим коллективимиз толы кебинде янъыртылган демеге боламыз. Олай дегеним, янъы куллыкшылар алганмыз, неге десе банк куллыкшылары ягыннан районда маьселе бар эди. Мен, мунда етекши болганда ок, «Ногай Эл» радиосы, Интернет аркасы ман, район яшавшыларын иске ерлестируьв орталыгында куллыкшылар кереги акында конкурс билдирдим. Баьри 6 куллыкшыды да конкурс негизинде иске алдым. Баьрисининъ де билим оьлшемлери туьрли, сонынъ уьшин мунда ислеектен алдын олар Махачкалада, Кизлярдагы банкларда практика оьттилер. Соьйтип, офисте эндигиси яс коллектив йыйылган. Аьли мунда клиентлер менеджери болып Солтан Картакаев ислейди. Ол ипотека бойынша бизде энъ ийги экономист болады. Потребительлер, пенсионлык кредитлерин беруьв аьрекетин клиентлер менеджери Сабира Раскельдиева юритеди. Земфира Дандиева, бас операционист болып, юридический лицоларды канагатлайды. Элина Койлыбаева – бас менеджер-операционист, Алтынбийке Абдуразакова – бас кассир, Динара Османова – кассир.
Коллективимиз бир тилде, бир ниетте куллык этеди. Бизим район яшавшыларын «Россельхозбанк» аркасы ман пайдаланмага шакыраман, неге десе мунда билимли, ис бажарымлы куллыкшылар ислейдилер. Куллык ягыннан бизде баьри де керекли алатларымыз бар. Йыл ызына дейим меканымызда толы кебинде капиталлык ярастырув ислерин оьткереекпиз, ол бизим клиентлер уьшин алдынгыдан да ийги эм онъайлы болаяк.
Хабарласувды юриткен
Магомет-Али Ханов.
