Саьбий тувганда, онынъ асы – анадынъ суьти, сол балага энъ де ийги ас болады. Каяктан алып карасак та, анадынъ суьти балага айлак пайдалы. Ол баладынъ кевдесин коршалайды. Алты айга дейим ана суьтин эмген балалар диарея, кусув, сувык тиюв, грипп, отит авырувлары ман сийрек авырыйдылар. Сондай балалар бир де авырмайды деп айтып болмаймыз, ама олар, баска балалар ман тенълестиргенде, тез сав боладылар, неге десе баладынъ ишинде инфекцияга карсылык беркийди. Баладынъ иммунитети беркленеди, соннан баскалай, бала йыласа яде тынышсызланып турса, анасы оны эмдирсе, ол парахатланады. Сол бек ийги зат.

Биз неше кере де эситемиз, туькеннен алып ас (смесь) иширткен балалар коьп уйклайдылар, ама сол акыйкат билдируьв тувыл. Тергевлерге коьре, сондай балалар, ана суьтин эмген балалардай болып, ашамага тилейдилер. Ана суьтин эмген балалар тез уйклайдылар, эмген мезгилде шаркта окцитоцин яйылып, балады уйклатады.
Бала заманда ана суьтин эмгенлер лейкемия, лимфома авырувлары ман сийрек авырыйдылар, олардынъ тислери де туьз, коьзлери де оьткир болады. Ана суьтин эмген балалар семируьв эм диабет маразлары ман уьйкен болганда авырмайдылар.

А.Тангатарова,
участковый педиатр.