Ногай район орталыгы Терекли-Мектеб авылындагы «Юлдыз» балалар бавы былтыр 17-нши март куьнинде капиталлык ярастырув ислерин оьткеруьв ниет пен ябылган эди. Юритилген тергевдинъ сырагысында бавдынъ меканы аьлиги заман талапларына келиспейтаганы белгиленген. Соны ман эскиди тайдырып, орынына янъысын сол ок 200 орынлы бав меканын курмага деген карар алынды. Сол ок ер майданында курувшылар былтыр куьзде кайтадан баска мекан тургыздылар. Соьйтип былтыр эм быйыл да курылыс куллыклары юритилип, оьткен куьнлерде янъыртылган «Юлдыз» балалар бавы кайтадан балаларга капыларын кенъ ашты.
– Бизде алдын да 12 балалар куьби болган болса, аьли де биз сол шаклы балаларды бавымызга алганмыз, – дейди бавдынъ заведующийи Солтанат Телемишева. – Алдынгыдан кайдай баскалык барма десенъиз, бавымызда айырым актовый залы курылган. Сол ок заманда оны спортзал этип те кулланаякпыз. Соны ман бирге аьр бир куьптинъ боьлмесинде айырым санузел эм аьжетханасы курылган. Алдынгы йылларда сондай онъайлык йок эди.
Мекан тоьгерегинде видео тергев, от туьсуьв бойынша сигнализация алатлары, ярыклар салынган. Баьри балалар уьшин де янъы орындыклар, ортопед матраслары аькелинген. Асхана, эгер алдынгы заманда мекан ишинде орынласкан болса, эндиги ол бав артындагы айырым меканда ерлескен эм сонынъ ишине баьри керекли янъы алатлар салынган.
Янъыларда бавдынъ коллективи балаларды хош коьрип алдылар. Тезден, 10-ншы сентябрь куьнинде, балалар бавынынъ янъы меканы шатлыклы аьлде ашылаяк.
М.Юнусов.
Суьвретте: «Юлдыз» балалар бавынынъ янъы меканында.