Ногай районымыздынъ администрация куллыкшылары оьткен юмадынъ сонъында, оьзлери аьрекет бардыратаган мекан тоьгерегинде заьлимдей куллыклар этип, табиат коьркин ярастырувга оьз уьлислерин костылар. Олар ман биргелесип Ногай район Депутатлар Йыйынынынъ депутатлары, ТереклиМектеб авылынынъ А-Х.Джанибеков атындагы орта мектебининъ эм Нариман авыл окувшылары иследилер. Яслардынъ куллык этуьви боьтен де суьйиндиреди, неге десе олар оьзлерининъ шынты патриотлыгын коьрсетедилер, соны ман бирге кыр куллыкларды этип, куьшкуватын да беркитедилер. Бу куьн кыр куллыкка шыкканлар Ногай район администрация азбарын, сонынъ янында орынласкан Кадрия атындагы паркын да тазаладылар, мунда олтыртылган тереклерди кыска аьзирледилер. Хатын-кызлардынъ наьзик коллары парк ишиндеги олтыргышларды сыр ягып янъырттылар. «Формирование комфортной городской среды» федераллык программа бойынша курылган балалар уьшин майданда да йыйнав ислер этилди. Сол балалар уьшин майдан бек керекли зат, мунда ата-аналар саьбийлери мен тыншаядылар, сол тазалыкта болса, боьтен де ийги болады. Тазалык – ден савлыктынъ бас кеби. Бу куьн ислеген аьдемлер авыр куллыктан арыганларын да сезбеди, буьтин этилген аьрекет баьрисининъ де коьнъилин коьтерди