Ногай район мектеблеринде согыс спецоперация катнасувшылары ман йолыгыслар уйгынлав ийги аьдетке кирди. Янъыларда сондай йолыгыслардынъ бириси Нариман авыл мектебинде оьтти. Мунда окытувшы Арувхан Мурзагельдиева 9-ншы класс окувшылары ман бирге бу мектебтинъ выпускниги, кыска болжаллы тыншаювга тувган авылына келген СВО катнасувшысы Батирхан Муталлаповты шакырды. Шарада тербиялав иси бойынша мектеб етекшисининъ орынбасары Барият Сангишиева, физкультура сабагынынъ окытувшысы Агабатир Эдильбаев, сыйлы конактынъ абасы Тойбике Эдильбаева, онынъ увылы Салих, кызы Марие, авылдасы Бурлиянт Тангаева, иниси Алхан Муталлапов эм баскалар ортакшыладылар. Бизим заманнынъ баьтирин окувшылар турагалып, карс кагув ман йолыгып, ога уьйкен сыйын эм суьйимин коьрсеттилер. Сыйлы конакты Арувхан Будайхановна балалар ман таныстырды: «Батирхан Муталлапов оьз яшавын аьскер службасы ман яслай байланыстырган. Мектебтен сонъ ол СанктПетербург каласындагы Михайловский аьскер артиллерия академиясында окыган. Яс офицер аьскер исин Оренбург областинде 92-нши ракета бригадасынынъ сырасында баслаган. Сонъ куллыгын Абаканда 119-ншы ракета бригадасында стартовая батарея командири эсабында бардырган. Согыс спецоперация басланган биринши юмалардан алып капитан Батирхан Салавдин увылы сонда борышлар толтырады. СВО -да ога штаб начальнигининъ исин бардырмага эм 52-нши артиллерия бригада сырасында кесек заман дивизион ман етекшилемеге де туьскен. Коьрсеткен эрлиги уьшин Батирхан Муталлапов коьплеген медальлер мен савгаланган». Шара бойынша окувшылар Аиша Бекманбетова, Азизбек Муталлапов, Омирзак Муталлапов, Дженнет Сарсеева, Сурия Тангаева юреклерге етип, согыс спецоперация катнасувшыларынынъ йигитликлери акында ятлавлар яттан айттылар. Сонъ балалар СВО барысында Эли уьшин янларын берген Нариман авылында тувып-оьскен эм яшаган эр йигитлер: Даниял Ильясовтынъ, Ренат Елманбетовтынъ, Ислам Абдулбариевтинъ, Ислам Аджиевтинъ, Тимур Муталлаповтынъ, Шамиль Менлигазиевтинъ, Осман Аджигайткановтынъ, Азамат Кургановтынъ, Хабибулла Байгазиевтинъ суьвретлерин алып, ортага шыктылар. Бу аьсерде олардынъ эстелигине йыйылганлар бир такыйка уьндемей токтадылар. Бу эр йигитлердинъ аьр бирисининъ оьз тарихи, оьз мыратлары эм ой-ниетлери болган, а баьрисин Элге каратылган уллы, шет-кырыйсыз сезими биргелестиреди. Йолыгыста Батирхан Салавдин увылы балаларды кызыксындырган соравларга явап берди. Окувшылар онынъ позывнойы калай экенин, согыс спецоперация бойынша алган савгалары, йолдаслары, аьли уьйде эм уьйден алыс якта кайдай сезимлер бийлейтаганы акында сорадылар. «Батя» позывнойы болган ердесимиз 2-нши дережели «За храбрость» патшалык медали мен, 1-нши дережели «За воинскую доблесть», «За боевое отличие» медальлери мен савгаланган. Олар не уьшин берилетаганы акында Арувхан Будайхановна балаларга хабарлады. Окытувшы Василий Лебедев-Кумачтынъ «Кто сказал, что надо бросить песни на войне» деген ятлавын окып, сизде СВО озган ерде бийиген эм йырлаган такыйкалар болама деген соравын берди. Батирхан Салавдин увылы, бир айлак та авыр борыш толтырып кайткан сонъ, коьнъил де бек тоьмен заманда, оьз йолдасларына анъды салдырып, ортага шыгып бийигени мен боьлисти. Сонъ ога баскалар да косылып бийип, йырлаган экенлер. Сосындай юреклерди айлак та куьшли мунълык бийлегенде, оьз коьнъилинъди коьтеруьв керек дегенди айтады бизим ердесимиз. Нариман авыл мектебиндеги йолыгыс бек йылы аьлде озувы, онынъ катнасувшыларынынъ эсинде коьпке дейим сакланаягын эртеректен сездирди. Бизим заманнынъ баьтири Батирхан Салавдин увылынынъ согыс спецоперация катнасувшысы эсабында, тувган мектебинде бу биринши йолыгыс болды. Онынъ анасынынъ соьзлери мен, Батирхан уьйине бек йогары коьнъилде, яс несилдинъ элине суьйимине эм Эл коршалавшыларга сый этуьвине бек куьезленип кайтты.

 Н.Кожаева. Суьвретте: Нариман авыл мектебиндеги йолыгыста.