Ногай район сайлавшылардынъ тилеклерин кабыл этуьв ниетте, янъыларда ДР-сынынъ «Агрострой» ГКУ етекшиси Рустам Хабилов пан ис йолыгысын озгардым. Бизим хабарласувдынъ бас темалары – Уйсалган авылына коьгилдим отын еткеруьв эм Шумлелик авылында – янъы мектеб курув акында. Рустам Микаилович эки сорав да Дагестан Республикасынынъ Аькимбасында каралмага кереклерден биринши сыраларда туратаганын белгиледи. Аьллер тынышлардан тувыл, ама шешуьв йоллары табылган. Шумлелик авылында мектеб курув бойынша яваплылыксыз коьрсеткен подрядчик пен келисуьвди бузувдан тура карар алынган. Тезден сенимли янъы организация ман контракт туьзилеек. Бизим ортак мырат – курылыс куллыкларды тамамлап, 2027-нши йылдынъ кырк кийик айына меканды кулланувга бермеге. Балалар аьлиги заманга келисли эм кавыфсызлык аьллерде окымага керек. Уй-Салган авылына коьгилдим отын еткеруьв бойынша график туьзилген. Проектсметалы документация 2027-нши йылга аьзир болаяк, а курылыс-монтажлы куллыклар эм коьгилдим отын уьйлерге беруьв 2028-нши йылга планга алынган. Бу соравлар коьп йыллардан бери йыйылып, яшавшыларды тынышсызландырып турганлар. Сайлавшыларга соьз беремен: аьллер меним тергевим астында. Аьр бир истинъ кезегин караякпан: эски контрактларды бузувдан алып янъы мектебтеги биринши занъга эм уьйлеринъизге коьгилдим отын еткеруьвге дейим. Биз басланган исти тамамламага борышлымыз. 

Алибек Мурзаев, ДР Халк Йыйынынынъ Депутаты.