Дагестан Республикасынынъ Аькимбасы Сергей Меликов ДР Халк Йыйынына каратылган Язбасында СВО сырасында куллык этип турган дагестанлылардынъ йигитлигин белгиледи.
– Озган йыл тек кыйынлыклардынъ эм кайгылардынъ йылы болмады. Ол бирликтинъ, сеним эм келеекке сенимнинъ йылы болды. Биз Россия ман оьктемсимей болмаймыз, элимиз, ердеслеримиз уьшин коршалавга турып, акыйкатлыктынъ эм аьдилликтинъ байрагын оьрге коьтерди. Энъ де суьйинишли эм маьнели, сол оьзгерислерде савлай дуныяга бизим йигитлерди баскалайтаган йигитлиги эм намысы яркырадылар, – деп айтты Сергей Алимович.
Дагестан Республикасынынъ Ногай районы да оьз увыллары ман оьктемсийди, олар явга карсы шыгып, йигитлерше согысадылар. Сол ясларымыз арасында Бораншы авыл яшавшысы Залимхан Аджиманбетов та бар. Залимхан бу авылда тувып-оьскен. Оьз тенълериндей болып, ерли мектебти битирип, Астрахань каласындагы кеспилик училищесине туьскен, «механосборочный ислерининъ слесари» деген кеспиди байырлаган. Сонъында яс эр борышын толтырмага кеткен, Мурманск областинде ВВС ПВО аьскерлеринде куллык эткен. 2009-ншы йыл контракт службасына туьскен. Залимханга бек ярайды куллыгы, онынъ айтувы, шынты эр кисилер сол кеспиди сайлайдылар. Энъ де маьнелиси, Залимхан йолдаслары ман буьгуьнлерде Аталыкты коршалавда турады. 2023-нши йылдынъ увыт айыннан алып Залимхан эр борышын Украина еринде согыс спецоперациясында бардырады. Онынъ ата-анасы Адылхан эм Хание Аджиманбетовлар, аьлейи Аминат, кызы Аниса эм увылы Халид коьтергишлейдилер, аман-эсен кайтсын деп куьтедилер. Язлыктынъ басында Бораншы авылынынъ мектебинде «Енъуьв сирени» деп акция оьтти. Сол шарада Залимханнынъ анасы эм увылы катнастылар, онынъ аты ман окувшылар тереклер шаштылар. Бораншы авылдынъ яшавшылары оьз йигити мен оьктемсийдилер.
– Биз енъермиз, яв бизим ерди бир де таптамас, – дейди Залимхан. Биз ясларга аман-эсен уьйге келгенин сагынамыз.
Г.Бекмуратова
Суьвретте: З.Аджиманбетов.