Янъыларда Дагестан Республикасынынъ Экономика эм территориаллык оьрленуьв бойынша министерствосы, 2020-ншы йылдынъ тамамларына коьре, экономикады оьрлендируьв уьшин ийги инвестиционлык авады туьзип болган ийги муниципалитетлер белгиленгенлер.

Бу шара йыл сайын озгарылады эм Россия Федерациясынынъ оьрленуьв конкуренциясынынъ стандартынынъ негизинде уйгынланады. Бу шарада катнасатаган муниципаллык туьзилис тийисли билдируьвди эм статистикалык белгилерди бередилер.
Рейтингтинъ бас ниети: инвестиционлык авады ийгилендируьв эм оьрленуьв уьшин этилетаган шаралардынъ маьнесин белгилев. Сол шара бойынша, тийисли шартларды оьтип, ийги деген муниципаллык районлар белгилендилер: биринши орынга – Буйнакский район, экинши орынга – Ахтынский район эм сыйлы уьшинши орынга Ногай районымыз тийисли болды.
Бу шарада кала округлары да катнастылар. Катнасканлар араларында биринши орынга – Махачкала, экинши орынга – Кизилюрт, уьшинши орынга Хасавюрт калалары тийисли болдылар.
Сондай сыйлы атларга тийисли болар уьшин, муниципаллык ра- йонлары да, калалары да белгиленген критерияларды оьттилер. Баскалай, районлардынъ ваькиллери анкетированиеди де оьттилер. Ерли самоуправлениелерге берилген анкетирование ишинде конкуренцияды оьрлендируьв стандартын киритуьвдинъ тамамлары бойынша соравлар да бар эди. Предпринимательлерге оьтпеге керек анкета ишинде, муниципалитеттинъ товар рыногын оьрлендируьв уьшин, кайдай куллыклар этилееги акында олар оьз ойларын айтпага болатаган ерлери де бар эди. Солай ок анкетирование потребительлерге де уйгынланды.
Енъуьвшилер Дагестан Республикасынынъ Экономика эм территориаллык оьрленуьв бойынша министерствосынынъ Сый грамоталары ман савгаланаяклар.
Г.Курганова.