Дагестан Республикасында онынъ етекшиси Сергей Меликов пан ашылган «Аталык Баьтирлерининъ Вахтасы» яс несилди патриотизм яктан тербиялав исинде маьнели эм керекли оьзгерис болды. Сонынъ акында оьз ойы ман Терекли-Мектеб авылдынъ 1-нши номерли Балалар-оьспир спорт мектебининъ директоры Айдархан Курманбаев боьлиседи.

– Дагестан етекшиси Сергей Меликовтынъ «Аталык Баьтирлерининъ Вахтасын» республика еринде ашканы, бир соьзсиз де, бек керекли эм пайдалы абыт болады. Бизде, дурысын айтканда, тек ясларды да тувыл, аьли мектебтеги, балалар бавларындагы балаларды кишкейлей сол ниетте тербиялав керек деп ойлайман. Меним эсимде бизим совет заманындагы балалагымыз. Сол йылларда патриотизм яктан тербиялавдынъ бир неше процентлерин биз аьли мектебке де бармай, оьз аьеллеримизде алатаган эдик, неге десе бизим аьеллердинъ хыйлысында аталар, акайлар, атайлар Уллы Аталык согысынынъ тири катнасувшылары болганлар. Сонъында мектеб эм студент йылларында биз коьплеген ямагат, аьскер-спорт, байрам шараларында, ветеранлар ман йолыгысларда катнасатаган эдик. Сонынъ уьшин мен, бизим республикага тири Россия Баьтирлери келген эм яслар ман йолыгыслар оьткередилер дегенди эситкенде, суьйинмей болмадым. Соны ман бирге Совет Союзынынъ Баьтирлерин де бизге мутпага ярамайды.
Биз алдынгы йылларда да эм аьли де бизим ДЮСШ-та балаларды туьрли спорт ойынларына уьйретуьвимиз бен бирге оларды патриотизм ягыннан тербияламага кереги акында да мутпаймыз. Айтпага, биз йыл сайын да эндигиси 30 йылга ювык заман яслар арасында футбол бойынша бизим авылдасымыз, Уллы Аталык согысынынъ катнасувшысы, аьвелде айтылган спортсмен Хайрудин Лукмановтынъ эм тагы да район бойынша баска белгили аьдемлердинъ эстеликлерине, Уллы Енъуьвдинъ мерекелерине эм сондай баска маьнели тарих куьнлерине багысланган турнирлерди дайым да оьткеремиз. Соларга биз район эм республика бойынша уьйкен сыйы болган аьдемлерди де шакырамыз. Бу ярыслар, элбетте, яс-явкадынъ эсинде калып, оларда патриотизм сезимин кеплендирмеге ярдам этеди, – деген ойын айтты Айдархан Курманбаев.
М.Ханов