Уьстимиздеги йылдынъ коькек айынынъ 12-нши куьнинде Оьз ыхтыярлык ойларын оьрлендируьв орталыгында Совет Союзынынъ Баьтири, космонавт Муса Манаров Дагестаннынъ яслары ман йолыгысты.

Йолыгыс «Баьтирлер мен кенъесуьвлер» деген программа бойынша уйгынланып оьтти. Дагестаннынъ Яслар ислери бойынша министерствосы ман уйгынланган йолыгыста орта мектеблерининъ окувшылары да ортакшылык эттилер.
Космонавт Муса Манаров йолыгыска йыйылганларды шатлыклы куьни мен кутлады эм Космонавтика куьни савла- йынынъ да байрамы болатаганын белгиледи.
– Баьри ердеслеримизди де байрам ман кутламага суьемен. Бу байрам тек космонавтлардыкы болып калмай, савлайдуныялык байрамы да болып келеди. Аьдем оьз бесигиннен, Ериннен айырылып, космос кенълигине шыкты, баьри аьдемлер де янъы оьрленуьв кезегинде боладылар, – деди белгили космонавт.
Баска болып, шарада катнасувшыларга деп, Муса Манаровтынъ орбитада болувы акында биографиялык фильми коьрсетилди. Муса Манаров 1987-нши йылдынъ карагыс айынынъ 21-нши куьниннен алып 1988-нши йылдынъ карагыс айынынъ 21-нши куьнине де- йим «Союз ТМ-4» деген кемесинде эм «Мир» деген орбита комплексинде бортинженери эсабында 365 кеше-куьндиз 23 саьат космоста болган.
Соьйтип ол космоска ушувында дуныялык рекордын салды. Яслар йолыгыс барысында Манаровка космонавтика тармагы бойынша коьплеген туьрли соравларын бердилер. Муса Манаров соравларга яваплай келип, Ердинъ артыннан карамага эм оны суьвретке сокпага онынъ суьйикли иси экени акында да белгиледи.
Йолыгыс кызыклы эм пайдалы болып оьтти.
Суьвретте: Муса Манаров.