Дагестан Республикасынынъ Аькимбасы Сергей Меликов Дагестаннынъ калалар эм авыллар аькимбасларына, инвестпроектлерди яшавга шыгарувга артык эс каратып, сол маьнели аьрекетте белсенлик пен ортакшылык этпеге шакырув этти.

Бу юма басында Дагестан Республикасынынъ Аькимбасы Сергей Меликов Дагестан Республикасында инвестицияларды яшавга шыгарув ман эм предпринимательстводы оьрлендируьв мен байланыста туьзилген аьлди ийгилендируьв бойынша Советининъ кенъесин оьткерди.
Кенъесте Сергей Меликов билдиргенлей, Дагестаннынъ инвестиционлык куржынында, ортак оьлшем этип эсаплаганда, 380 млрд. маьнет акшадан артык кадерге 49 проектлер бар.
Регион етекшисининъ соьзлерине коьре, инвестициялар оьрленуьвдинъ миллет мыратларына етисуьвге, гражданлардынъ аян келимлер алувын канагатлавга эм олардынъ яшав сапатлыгын арттырмага себеплигин тийгистпеге керек.
Кенъесте Дагестанда инвестпроектлерди яшавга шыгарув аркасында 1600-ден артык исшилер орынлары ашылганы белгиленди.
Сондай туьзилген ийги як аьл мен байланыста ДР Аькимбасы Сергей Меликов республика еринде проектлерди яшавга уьстинликли шыгаратаган инвесторларга оьз разылыгын билдирди, сол ок заман регион аькимбасы республика министрлерин сол инвестпроектлерди яшавга шыгарувда демевлигин тийгистпеге шакырды. Ол солай ок инвестпроектлердинъ оьрленуьвинде муниципалитетлер аькимбаслары да белсен катнаспага керегин белгиледи.
– Етекшилер оьз ерлери уьшин не затлар керегин, аьне яде мине калаларда эм авылларда кайдай инфраструктуралык проектлер, кайдай кепли бизнес оьрленмеге болаягын биледилер, – деди ДР Аькимбасы Сергей Меликов.