1922-нши йылдынъ курал айынынъ 19-ншы куьнинде комсомол организациясынынъ экинши савлайроссиялык конференциясында яс-явкадынъ коьлемлик козгалысы – пионер отрядларын туьзбеге карар алынган. Соннан бери юз йыл озган болса да, Пионерлер куьни аьли де белгиленеди.

Уьстимиздеги йылдынъ курал айынынъ 18-нши куьнинде Ногай районымызда да эллиден артык окувшылар пионер деген атка тийисли болып, мойынларына пионериядынъ белгиси– сол организациядынъ агзасы болганды коьрсеткен галстугын байлады. Сол ийги борышты, алдынгы йылларда комсомол организацияларынынъ сыраларында болып, белсен куллык эткен ясуьйкенлер толтырдылар.
Бу куьн пионер организациясынынъ сыраларына кирген окувшылар алдында Ногай район КПРФ биринши секретари, ДР Халк Йыйынынынъ депутаты Мурзадин Авезов, Кизляр кала депутаты Артур Амиралиев, Оразманбет Копиев соьйлеп кеттилер. Окувшылар пионерлер болып кайдай борышларды толтырмага керегин айттылар, йырлар йырладылар.
Бу куьн Ногай район пионер организацияларынынъ сырасы 53 пионерге оьсти.
Ногай районы бойынша пионер организациясынынъ 100 йыллык мерекесине багысланган шара футбол турнирининъ озгарылувы ман тамамланды.