Савлай халкымызды суьйиндирип, элимиздинъ туьрли муьйислерине, шет эллерде яшайтаган ногайларга – баьрисине де TV-Дослар ногай телевидение ашылды деген хабар келди. Мен ногай миллет телевидениесининъ директоры, ногайдынъ зейинли увылы Даниял Исакаев пен йолыгысып, хабарластым. Соравларымнынъ бириси – сондай иске сизди не зат даьвлендирди?
– Бизим ногай халкымыз бир ерде яшамайды, ол бурынъгыдан алып кавмак кимик коьшип-конып юрген халк, аьлиги заман савлай дуныя бойынша шашыраган. Савлай дуныя ногайлары телевидение карасынлар деген ниет пен мен онлайн-телевидение болса экен деген ойга келдим. Баскалай, мени куьнлев сезими бийледи, куьнлевим де яман тувыл, ак эди. Баска халкларда телевидение, радио бар, бизде де болса экен деп ойлайтаган эдим. Сол информационлык майданда ногайлар сулыбы ман боьлиспеге, ногай йырлар эситпеге амал тапканы бек аьруьв деп ойладым.
Финанслар яктан кыйынлыклар коьп болды. Досларым акша йыймага керек деген билдируьв бердилер. Мен суьймеген эдим акша йыйнамага, ама досларым мага сонда уят йок деп айттылар. Халктан 200 мынъ маьнет акша йыйналды. Тама-тама коьл болар дегенлей, аз-аздан йыйналды, бирев 1000 маьнет акша, баскасы -5000 маьнет, спонсорлардынъ биревлери 50 мынъ маьнет акшадан йыйнадылар. Буьгуьнлерде телевидение майданы аьзир. Телевидениединъ ийги яклары коьп, оны кайсы ерден де карамага болады, баскалай, телефонда, интернет бар телевизорларда да карамага болады.
Мен ногай халкыма шакырув этпеге суьемен – каналды коьтергишлев керек, каравшыларсыз телевидение болмайды, – деп хабарлайды миллет телевидениединъ директоры.
Мен ойлайман, бир айга 149 маьнет акша таппага кыйын тувыл.
Даниял Исакаев ногай халкына уьйкен куллык этти. Былтыр карантин куьнлеринде басланган куллык оьз сырагыларын берди. Даниял ногай йырлар, шаралар, хабарласувлар йыйнады, эски кассеталардан уьйкен архив туьзди. Аьлиги заманда Дослар Тv негизинде ногай йырлар видеороликлери, ногай халкы акында региональли каналлардынъ программалары, айтувлар эм такпаклар видеороликлери, ногай театрынынъ спектакльлери, документальли фильмлер эм сондай баска материаллар бар.
Янъыларда Ногай районына ис йорыгы ман Информатизация эм баспа министри Умаросман Гайбуллаевич Гаджиев келип кетти. Даниял Исакаев оны ман йолыгыста телевидение акында хабарлады. Министр онынъ халкы уьшин эткен куллыгын белгилеп, оьз ягыннан коьтергишлев коьмегин этеегин билдирди.
Телевидениеди коьтергишлев кереги акында Ногай район аькимбасы Мухтарбий Кошманбет увылы Аджеков та билдирди. Кашан да, йогары етекшилеви яктан коьмек бек керек, болса да буьгуьнлерде ногай телевидениемиз болувына оьзимиз демевлик этпеге керекпиз. Тек сол заман мыратларымызга етермиз.
Г.Бекмуратова.
Суьвретте: Д.Исакаев.
