Янъыларда Ногай районымыздынъ орталыгы Терекли-Мектеб авылында орынласкан А.Тахо-Годи атындагы миллет музейининъ филиалында, бир куьн ишинде, Кавказ еринде болган урыслардынъ 80 йыллыгына эм Дагестан Республикасынынъ Конституция куьнине багысланган маьнели шаралар болып озды. Сондай салдарлы куьнлерге багысланган шараларда «Ногайский район» МР администрациясынынъ эм Согыс эм Савытлы куьшлер ветеранлар советининъ председатели Акманбет Мусаевич Сангишиев, Хатын-кызлар советининъ председатели Асият Бадий кызы Манкаева эм «Яслык» яслар орталыгынынъ куллыкшысы Азиз Амирханович Аджиев эм Ногай районымыздынъ туьрли авыл мектеблериннен окувшы-волонтерлар ортакшылык эттилер.
Дагестан Республикасынынъ Конституция куьнине багысланган шарады музей етекшиси, Дагестан Республикасынынъ ат казанган маданият куллыкшысы Каирбек Сейдахмет увылы Бальгишиев ашты эм байрам акында Асият Бадий кызы келбаклап хабарлап озды.
Дагестан Республикасы, сол санда бизим Аталыгымыз – Ногай шоьлимиз де бар. Сонынъ оьрленуьвине уьйкен косымын эткен аьдемлеримиз де бар. Солардынъ бириси – бизим бек талаплы кызымыз Кадрия. Онынъ «Меним Дагестаным» деген ятлавын Нариман авылынынъ Алимхан Асанов атындагы мектебининъ окувшысы Осман Тенгизов окып кетти.
Кавказ еринде урыслардынъ болып озганына 80 йыл толувына багысланган шарады оьзининъ хабарлавы ман кызыклы этти Акманбет Муса увылы Сангишиев. Онынъ хабары боьтен де кызыклы эди окувшыларга.
– Махач Дахадаев атындагы партизан отрядынынъ агзалары Уллы Аталык согыс заманларында бизим районымызда айлак коьп куллыклар эттилер, Уллы Енъуьвди ювыклатувга оьз яшав оьмирлерин кыскарткан нешевлер де бар. Бизим районымыздан 2500 аьскерши согыска кеткен эди, артына 500 кайтып келди, – деп хабарлады ол.
Оннан сонъ музей куллыкшылары ман Кавказ еринде болган урыслардынъ 80 йыллыгына багысланып аьзирленген суьвретлер выставкасына Акманбет Мусаевич айырым эс берип, аьр бир сонда суьврети болган ветеран акында хабарлады.
Бу куьн музейде болган шаралар яслардынъ эслеринде калаягына шек йок.
Бу календарь бойынша белгиленетаган байрамлар – бизим тарихимиз эм яшавымыз.
Г.Курганова.
Суьвретлерде: А.Тахо-Годи атындагы миллет музейининъ Ногай районындагы филиалында болган шаралардан коьринислер.
