Тарумов районында «Биз бирге» деген акциясы барады. Тарумов районында, аьлиги заманда согыс борышын толтырув уьшин мобилизация бойынша эм оьз эрки мен кеткенлердинъ аьеллерине гуманитарлык ярдамы еткериледи. Оьткен саьли куьн, караша айынынъ 15-нде, администрация делегациясы оьз тизиминде район аькимбасынынъ орынбасары Мурад Абдулазизов эм муниципалитет администрациясынынъ куллыкшылары болып гуманитарлык ярдамы ман Ново-Дмитриевка авылында болып кеттилер. Онда олар авыл Аькимбасы Рашид Манапов пан бирге мобилизация ман кеткен аьскершилердинъ аьеллерине азык-туьликти эм сонынъ ишинде мобилизация ман кетип согыс спецоперациясында катнасатаган Нариман Абдулжалиловтынъ аьелиндеги балага автокресло эм ба́лалар уьшин коляскады́ еткердилер.
Караша айынынъ 16-ншы куьнинде гуманитарлык ярдамы Раздолье авылыннан мобилизация ман кеткен Сергей Ницевичтинъ кардаш-тувганларына еткерилди. Коьзлеринде коьзяслар ман я́рдамды Сергейдинъ тетеси, Раздолье авыл орта мектебининъ баслангыш классларында 40 йылга ювык куллык эткен ис ветераны Раиса Алексеевна Митрофанова алды. Тийисли гражданин болып оьскен уныгы акында ол юреги телезип булай деди: «Ол бизде ийги билим алган, куллык этетаган эди. Повестка келгенде, мага келип айтты: «Тетем, сен йылама, карсаланма, сен бизди баскалардынъ аркасынынъ артына тыгылманъыз, эткен исинъ уьшин явап берип билинъиз», – деп уьйреткенсинъ.
Ол аьр дайым да соьйтип этеди. Янъыларда алдышылыкта болганда оьзиннен шеккиси мен эки кере арткан авыр яраланган йолдасын тасага тартып шыгарган. Сергей оьзи 60 килограмм болады. Йолдасын Москвага госпитальге йибергенлер, алты операциядан сонъ колын аман акалганлар, аьли ол эмленеди. Сергей оьзи де яраланган, ядырадынъ кесеги колына тийген. Эмленип ол оьз боьлигине кайтып барган», – деп хабарлайды Раиса Алексеевна район администрациясынынъ аькимбасы Александр Зиминге эм гуманитарлык ярдамы уьшин эм мундай ийги исти уйгынлаганлардынъ эм ога оьз косымларын эткенлердинъ савлайына да разылыгын билдирип. Буьгуьнлерде «Биз бирге» деген акциясы Тарумов районында, солай болып, савлай республикада да аьрекетин бардырады.
Суьвретте: акциядынъ барув мезгили.