Янъыларда Окытувшылар куьнине багысланып озган шарада Астрахань Президентлик академиясынынъ (РАНХиГС) доценти Эльдар Шамигуллович Идрисовка билимлендируьв тармагындагы етимислери уьшин сыйлы белгиси шатлыклы аьлде тапшырылды. Сондай йогары савга педагогтынъ элли йыллык мерекеси эм, баска болып, маьнели билимлендируьв проектлерин етекшилеви эм власть органларына оьз ярдамын этуьви мен байланыста тийисли этилди.
Эльдар Идрисов яшавынынъ коьп йылларын педагогикалык эм илми-тергев аьрекетине багыслап келеди. Ол оьз кеспилик йолын 1998-нши йыл А.Джанибеков атындагы Растопуловка авыл орта мектебинде баслаган.
Оннан сонъ оьз окытувшылык билимлерин тек мектебте тувыл, йогары окув эм косымша билимлендируьв тармагында да оьстируьв уьстинде куллык этип келген. 1998-нши йыл ол Астрахань каласындагы патшалык педагогикалык университетинде окып тамамлап, тарих эм ыхтыяр сабагы бойынша дерисиннен окытувшысы кесписин байырлап, 2005-нши йыл политика илмилерининъ кандидаты дережесине соисканиеге диссертациясын коршалайды, а 2021-нши йылда РАНХиГС институтында Юриспруденция боьлигинде билим алады. Коьп йыллар узагында Эльдар Идрисов регионнынъ кадрлар байлыгын кеплендируьвде катнасып, патшалык, муниципаллык, проектлик управление бойынша бас дерислериннен студентлерге билим берип келеди. Онынъ илми етекшилеви бойынша студентлер заман-заманы ман савлайроссиялык социаллык проектлери эм илми куллыклары бойынша кон-
курсларынынъ енъуьвшилери боладылар. Эльдар Шамигуллович юзден артык илми шыгармаларынынъ эм РАН-
ХиГС патшалык управлени- еси бойынша йогары мектебининъ «Управление межэтническими и конфессиональ-
ными отношениями: теория и практика» деген окув амалламасын туьзуьвде баскалар ман бирге оьз косымын эткен
автор да болады. Онынъ аьрекетинде тербиялав эм миллет маданият бойынша иси айырым орынды тутады. 2001-нши йылдан алып ол, яслардынъ патриотлык эм маданият аралык тербиялавына каратылган, «Этномикс» авторлык регион бойынша проектин етекшилеп келеди. Оны ман туьзилген «Этнокультурный код Астрахани» организациясы, регион тарих-маданият асабалыгын уьйренуьвге окувшыларды эм студентлерди тартувга каратылган «Этнокультурные путешествия. Астрахань свозь века» проектин яшавга шыгарувга Президентлик фондынынъ грантына тийисли этилген. Эльдар Идрисовтынъ бас регионаллык программалары, айтпага, «Смена», «Школы лидеров» проектлерин етекшилеви ис аьрекетинде маьнели орынды алады. 2025-нши йылдынъ кырк кийик айыннан
алып, ол СВО ветеранлары эм онынъ катнасувшылары саныннан етекшилев кадрларын аьзирлев ниетте туьзилген РАНХиГС Астраханьдеги филиалы атыннан «Победоносец» регион бойынша билимлендируьв программадынъ етекшиси де болады.
Сол программады етимисли етекшилеви оны патшалык савгасына тийисли эттирди. Оннан баска Э.Идрисов
ямагат-экспертлик аьрекетинде де белсенли катнасады.
Ол Астрахань областининъ билимлендируьв эм илми министерствосы бойынша ямагат советининъ, регион
бойынша УМВД ямагат советининъ, миллетлер эм динлер ара Астрахань каласы бойынша аькимбасы советининъ,
баска болып, «Дельта» клуб етекшиси президиумынынъ тизимине де киреди. 2009-ншы йылдан алып 2021-нши
йылга дейим ол ана тилди эм миллет туризмди саклав бойынша проектлерин оьрлендирип келуьв ниет пен «Эдиге»
Ногай маданият орталыгын етекшиледи. Эльдар Шамигулловичтинъ кеспилик етимислери алдын да РАНХиГС
Сый грамотасы ман, сол ок йогары окув ошагынынъ ректорынынъ Разылык хатлары ман, Астрахань области бойынша Думадынъ «За развитие парламентаризма и гражданского общества» Сыйлы белгиси мен белгиленген. 2020-ншы йылда ол Президентлик академиясынынъ педагогикалык практикасы бойынша конкурсынынъ енъуьвшиси, 2025-нши йылда сессияларды озгарувынынъ методологиясы бойынша РАНХиГС «Красная профессура» мектебининъ сертификациясын да оьткен.
– Меним уьшин савга – ол тек меним куьш салувым болып калмай, уьйкен командадынъ, айтпага, Президентлик академиясы тармагыннан ис йолдасларымнынъ эм студентлеримнинъ, власть органларыннан эм ямагат
биригуьвлериннен партнерлардынъ ис аьрекетин баалавы да болады. Билимлендируьв – ол дайым да бирге-
лес иси эм мен регионымыздынъ оьрленуьвине уьлисимди косатаган амалым уьшин бек разыман, – дейди Эльдар Идрисов. Губернатордынъ атыннан Сыйлы белгиге тийисли этилуьви – Эльдар Шамигулловичтинъ власть органлары уьшин кадрларын аьзирлев, миллетлер ара кенъесуьвди беркитуьв, яслар баславларын эм согыс спецоперация катнасувшылары уьшин билимлендируьв амалларын туьзуьв бойынша коьпйыллык яваплы эм бир минсиз йогары маьнели иси болады.
Суьвретте: Эльдар Идрисовка белги тапшырылув мезгили.