Янъыларда Кизляр районындагы Огузер авыл орта мектебинде «Аьлиги мектеб» деген федераллык проектининъ «Билимлендируьв» деген миллет проекти бойынша «Точка роста» деген естественный илмилерге негизленген билимлендируьв орталыгы шатлыклы аьлде ашылды.

Орталыкта келеекте химия, биология, физика окув сабаклары бойынша ортак билимлендируьв программалардынъ да яшавга шыгарылувы каралаяклар. Кабинет окувшылардынъ эм окытувшылардынъ куллык этуьви уьшин аьлиги заманга келисли алатлар, айтпага, лего-конструкторлар, цифровой лаборатория ман, робототехника ман ярастырылган.
Ашылган орталык Огузер авыл орта мектебининъ окувшыларына баьри ягыннан да оьрленмеге, оьспеге демевлик болаяк. Орталыктынъ ис аьрекети окувшыларга сапатлы эм аьлиги заманга келисли билимин беруьв, солай болып, балаларда аьлиги заманнынъ илми ягыннан болымлыкларын кеплендируьв бойынша ярдамласувда оьз амалларын кенъейтип келеегине соьз йок.
Суьвретте: Огузер авыл орта мектебинде «Точка роста» билимлендируьв орталыгынынъ ашылув мезгили.