Этнографиялык диктант ___________________

Янъыларда Россияда Халклар бирлигининъ куьнине багысланып, «Уьйкен этнографиялык диктант» акциясы оьтти. Белгиленген акциядынъ уйгынлавшылары– Удмуртия Республикасынынъ Миллет политикасынынъ министерствосы эм миллет ислери бойынша Федераллык агентствосы.

Дагестан Республикасында диктантты 58 майданда яздылар, олардынъ энъ де уьйкени Махачкаладагы Татымлык уьйи болды. Шарада катнасар уьшин мунда студентлер, илми куллыкшылар, ямагат организациялар ваькиллери, политика аьрекетшилери йыйылдылар. Баьри йыйылганларды ДР Оькиметининъ Председателининъ орынбасары Анатолий Карибов хошлады. Онынъ соьзлери мен, мундай шараларда катнасув бизди ювыкластырады, миллетлер ара татымлыкты туьзеди. Тагы да ол озган йыл диктант язувда 392 мынъ аьдем ортакшылык эткенин белгиледи.

Акцияга Ногай районы да косылды. Мунда диктантты А-Х.Джанибеков атындагы мектебтинъ негизинде окытувшылар, Ногай район билимлендируьв управлениесининъ куллыкшылары эм баскалар яздылар. Акция катнасувшылары 45 такыйка ишинде 30 соравга явап бермеге тийисли эдилер. Олардынъ сырасындагы 10 сорав айырым аьр бир регионга деп аьзирленген эди. Дагестан Республикасыннан акция катнасувшыларына туьзилген соравларда мунавдай да бар эди: «Калмык шай ногай шайдан не мен баскаланады?».
Кайдай да бир себеплерден тура акцияда регионаллык майданларда катнасып уьлгирмегенлерге Уьйкен этнографиялык диктанттынъ официаллык сайтында www.miretno.ru караша айдынъ 1-4-нши куьнлеринде онлайн-тестирование уйгынланды.

Борышларга дурыс яваплар уьстимиздеги йылдынъ 10-ншы караша айында www.miretno.ru сайтында шыгаяк.

Н.Кожаева.