«Окытувшы» деген сыйлы атты ийгилердинъ ийгилери юритедилер. Оны эм мектебте окыган йылларды аьр бир аьдем савлай яшавы бойынша эсинде саклайды. Окытувшыдынъ уллы иси, исине юрегин, янын беруьви болмаса, аьр бир балада онынъ ясыртын оьнерлерин сезип билмесе, дуныяда айтылган куллыкшылар болмас эди. Окытувшыдынъ аты алдында аьр кайсымыз, тизимизге шоьгемиз!

Ногай районынынъ Халк яратувшылыгынынъ эм маданият оьрленуьвининъ орталыгында янъыларда «Несиллер дайым эсинде, окытувшыдынъ уллы исин сакларлар» деп аталган шатлыклы шара уйгынлы оьтти. Мунда шатлык иелерине каратылган бек коьп йылы соьзлер, кутлавлар, йоравлар айтылдылар, билимлендируьв тармагында уьстинликлерге етискенлерине Сый грамоталар тапшырылдылар. Олардынъ сырасыннан бир нешевлери «ДР билимлендируьв алдышысы» деген атка тийисли болган эдилер – Ашувхан Отевова, Кабират Елгишиева, Фатима Оразова, Софья Бекишиева, Райнет Муталимова.

Байрамда биринши соьз «Ногайский район» МР администрациясынынъ аькимбасы Мухтарбий Аджековка берилди. Ол Ногай районынынъ алтын фонды, тиреви эм оьктемлиги – окытувшыларды кеспи байрам ман кутлап, элимиздинъ келеектегиси олардынъ колында экенин белгиледи. Сонъ Ногай район билимлендируьв боьлигининъ етекшиси Алтын Агаспарова йыйылганларга оьз докладын окып эситтирди. Оннан сонъ соьзди «село Терекли-Мектеб» СП МО аькимбасы Зейдулла Аджибайрамов алды. Солай ок билимлендируьв тармагынынъ куллыкшыларын Ногай районынынъ профсоюз комитетининъ председатели Зарета Аюпова кутлады эм онынъ шакырувы ман залда болган баьри педагогикалык исининъ ветеранлары сахнага коьтерилдилер эм оларга гуьллер савгаланды. Тагы да шатлык иелерин педагогикалык исининъ ветеранлары Йолмамбет Агаспаров эм Тамара Истомина, Ногай район саз алатлар оркестрининъ етекшиси Бекмурза Кудайбердиев кутладылар.

Окытувшылардынъ кеспи байрамына багысланган шара концерт пен тамамланды.

Н.Кожаева.
Суьвретте: сыйлы атка тийисли болган окытувшы А.Отевова.