Куьн сайын Дагестанда «Ян йылувлыгы» акциясына туьрли организациялар, окувшылар, медсестралар эм бу ак ниетли исти баьрине де ортак деп санаган коьплеген баска яшавшылар да кириседилер.

«Ян йылувлыгы» акциясы бардырылатаганын «Аталыгымыздынъ аьскершилерининъ аьеллер Комитети» Савлайроссиялык организациясынынъ региональлик боьлиги мен билдирилген.
Бу ийги ниетли акцияга Ногай районында да белсенли киристилер. Айтпага, «Шоьл тавысы» республикалык газетасына Орта-Тоьбе авылынынъ мектебке дейимги «Юлдыз» учреждениесининъ директоры Асият Кожаева билдиргенлей, балалар оьз тербиялавшылары ман бирге бу иске уьйкен белсенлик пен киристилер: куллыкшылар аьскершилер уьшин блиндаж шыракларын ясайдылар, балалар кесилген картон кагытларда аьскершилерге каратылган оьз йоравларын суьвретлейдилер.
Балалардынъ эткенлери, оьзек те, аьскершилерге бек баалы. Блиндаж шырак аьскершилерге бек керек зат: оны ман окопларда йылынмага, ас йылытпага болады.
– Тербияланувшыларымыздынъ ата-аналары да бу керекли акциясында ортакшылык эттилер, уьйкен разылыгымды билдиремен оларга. Соьйтип, биз ердеслеримизге оьз саламымызды йиберемиз, ондагы аьскершилерге этилетаган коьмекке оьз уьлисимизди косып. Олар уьйкен Енъуьв мен кайтаягына шекленмеймиз, – дейди Асият Кожаева.
Эске тагы да салайык, бу «Ян йылувлыгы» акциясынынъ мырады – СВО зонасындагы аьскершилерге блиндаж шыраклар аьзирлев. Олар кол астындагы затлардан (консерва банкасы, картон кагыты, парафин) ясалады. Онынъ аркасы ман ас аспага, йылынмага, сувланган кийимлерди кептирмеге болады. Ол, бир ийис шыгармай, ел эсуьвде тыммай, орташа 3-8 саьатлер узагында янады.
Белгилеп озайык, окопларды йылытув эм ярыкландырув уьшин майшыраклар аьзирлев ойы Махачкала каласыннан Ильясовлар аьелине келди: эрли-хатын Гаджи эм Марзиеттинъ баславы ман аьскершилерге коьмек этуьв фондына юзге ювык майшыраклар йиберилген.