Дагестан парламентининъ кезекли сессиясында депутатлар «2021-2023-нши йыллардынъ план кезегине Дагестан Республикасынынъ бюджети акында» деген закон проектин биринши окылувында кабыл эткенлер.

Бу закон проекти бойынша бас доклады ман ДР финанслар министрининъ куллыгын юритуьвши Юнус Саадуев шыгып соьйлеген.
Докладшы документ уьстинде бюджет карыжларын бас уьлестируьвшилер мен бирге, келимлердинъ бас администраторларынынъ, сонынъ эсабында Оькиметтинъ налог органлары ман структуралык боьликлерининъ, солай ок Халк Йыйынынынъ профильли комитетининъ эм республикадынъ Эсаплав палатасынынъ катнасувы ман куллык юритилгенин белгилеген.
«Бюджет исининъ баьри катнасувшылары уьшин бас борыш – ол Россия Президенти мен белгиленген социаллык борышларды толтырувга етисуьв. Соны ман бирге республика бюджетининъ берклигин эм сонынъ шыктажлар ман келимлер статьяларынынъ тенълигин саклав маьнели», – деп анълаткан Ю.Саадуев.
Бюджет проекти мен келисли кепте республикалык бюджетининъ келимлери эндиги йылга 134,1 миллиард маьнет, шыктажлар бойынша – 137,3 миллиард маьнет, бюджет дефицити – 3,2 миллиард маьнет акша деп белгиленген.
Бюджет проектининъ экинши окылувына бу санлар туьрленеек, неге десе республика уьшин косымша бюджетлер ара карыж келмеге тийисли, деген министрдинъ куллыгын юритуьвши.
Шыктажлар ягын алып караганда, бюджеттинъ 30,8 проценти «Билимлендируьв» тармагына, 26,5 проценти – «Социаллык политика», 13,2 проценти – «Миллет экономика» тармакларына каратылган.
Сессияда Халк Йыйынынынъ бюджет, финанслар эм налоглар бойынша председатели Сейфулах Исаков, республикадынъ Эсаплав палатасынынъ председатели Билал Джахбаров, республика парламентиндеги партия фракцияларынынъ етекшилери шыгып соьйлегенлер.