«Шоьл тавысы» ногай газетасына быйыл – 90 йыл. Аз заман тувыл, юзйыллык оьмирге ювык. Сол йыллар бойы бу ногай баспа шыгармасын дуныя юзине шыгарув ис аьрекетине коьплеген ердеслеримиз оьз уьлисин косканлар эм косадылар.

Буьгуьн биз уьйкен сый-оьрмет пен арамыздан тайганларды йылы эскеремиз, коьз алдымызга олардынъ ярык келпетлерин келтиремиз. Аьр бириси – дайымга бизим эсимизде. Сондайлардынъ бириси – ясуьйкенимиз Медине Джагапировна Курбанова. Онынъ сыйлы аты ногай газетамыздынъ тарихинде, онынъ кызыклы оьзгерисли йылязбасында сакланады. Яшав оьмирининъ 30 йылларын багыслаган ол ана тилимизде шыгарылатаган «Шоьл тавысы» газетасын ер юзине эндируьвге. Медине-абай (соьйтип атаганмыз биз оны ногайдынъ сыйлы аьдетине коьре) бизим эсте эм оны таныган эм оьрметлеген аьр бир аьдемнинъ коьзлери алдында бир кепте сакланган: ал деп оьзининъ айткан соьзине эм ис борышларына яваплы, уьй ошагына, тувган ерине алал, балалары уьшин яныплы. Бизде оны танымаган эм сыйламаган аьдем йок эди, неге десе ол оьзи де аьр бир аьдемди (карт болсын, яс болсын) оьрметлеп билген. Арада ол Кобан ягасында орынласкан оьз авылын, ондагы авылдасларын уьйкен сагынувы ман эсине алатаган эди. Ол да онынъ бийик аьдемшилигининъ ийги нышаны эди. «Шоьл тавысы» ногай газетасынынъ ерли редакциясында Медина Джагапировна секретарь-машинист ис орынында аьрекет эткен. Алдын линотип эм сондай баска баспа алатлары йок эди. Эски баспа алатында Медина Курбановага баьри журналистлердинъ кол ман язган макалаларын йыйнамага керек болган: куьнде 1000-1200 сыдыра йыйнамага туьскен. Ол куллык та – енъиллерден тувыл: туьрли кепли кол язба ман аьзирленген макалаларды эш бир янъылыссыз баспа алатында йыймага туьскен. Бу тыныш тувыл ис аьрекетин ол эш бир минсиз толтырып келген. Мине тек соьйтип сакланады ол бизим эсимизде, сыйлы аты болса ярык эстелик эсабында ногай газетамыздынъ тарихинде яшайды.
Бизим хабаршы.
Суьвретте: М.Курбанова.