Халклар ара Хатын-кызлар куьни язлыктынъ ярык куьнлерининъ келуьви мен белгиленетаган байрам. Бу байрамда аьдемликтинъ куватлы кесеги аналарын, хатынларын, аьптелерин эм карындасларын, кызларын ак юректен шыккан соьзлерин айтып, кушак толган гуьллерди савгалайды. Сол куьн белгиленеектен алдын Ногай район администрациясынынъ аькимбасы Джамалутдин Эсиргепов специальли согыс операциясынынъ катнасувшыларынынъ аналарына, хатынларына уьйкен сый этип, оларды уьйлерине барып, кутлав соьзин айтып кетти, аьр бирисине гуьл байламын эм уьйкен болмаган савкатын да тапшырды.
– Аявлы аналар! Сиз яшав берген увыллар бу куьнлерде Россия Федерациясынынъ япсарларын коршалавга йигерли абытларын эткенлер, олар сизинъ берген алал суьтинъизди аклайдылар, Элимиздинъ шынты патриотлары да боладылар, оьктемсиймиз биз олардынъ аьр бириси мен эм сизди колтыклав бу куьн бизим борышымыз эм муниципалитеттинъ тергеви астында турады, – деди Джамалутдин Эсиргепов СВО катнасувшыларынынъ аналарына соьзин каратып.
Бу куьнлерде СВО катнасувшыларынынъ аьеллерине муниципалитет ягыннан яхшы колтыклав этилинеди. Аьр бир СВО катнасувшысынынъ аьелининъ агзасынынъ маьселеси тийисли аьлде шешиледи деп айтпага боламыз.
Халклар ара Хатын-кызлар куьн – ярык язлык куьни мен бирге келеди. Сондай яркыраган куьн саьвлесин аьр бир хатын-анага, увылларын сав эсен йолыкканды йораймыз.
Г.Сагиндикова.
Суьвретте: Д.Эсиргепов СВО катнасувшысынынъ уьйинде конакта.