Озган юмадынъ ишинде ДР миллет политика эм дин ислери бойынша министерствосында Узбекистан Республикасынынъ делегациясы ман йолыгыс оьтти. Кардаш республикасыннан делегацияды Узбекистаннынъ туризм оьрлендируьв бойынша Госкомитетининъ председатели Уткир Саидов етекшиледи.

ДР Миннац етекшиси Энрик Муслимов келген конакларды хош алып, Дагестан Республикасы республикалар арасында биргелес ислеви уьшин экенин белгиледи.
– Бизим биргелес ислевимиз маданият, илми, туризм бойынша оьрленуьвине оьз салдарлы уьлисин косар деп шекленмеймен. Биз бир-биримизди анълаймыз, неге десе тек туьнегуьнлерде биз бир элдинъ республикалары эдик, бизим тарихимиз, динимиз ортак, – деди Энрик Муслимов. Оьз соьйлевинде Уткир Саидов Дагестан эм Узбекистан бурынъгыдан алып катнасадылар деп белгиледи.
– Кавказ еринде бизге кардаш халклар яшайдылар, олар Узбекистан ман тар байланыс тутадылар, сизинъ коьплеген ердеслеринъиз, белгили дин аьрекетшилер, Самаркандта окыганлар, – деди У.Саидов. Онынъ айтувы ман, буьгуьнлерде биргелес ислевдинъ биринши барысы – хадж туризми. Сонъында «Россия – меним тарихим» паркында Узбекистан Республикасынынъ зиярат-туризмининъ амалларынынъ презентациясы озды. Бу шарада Ногай районынынъ «Конак уьй» туризм орталыгынынъ етекшиси Гульзара Эсмухамбетова катнасты.
– Презентацияда Узбекистанга эм Дагестанга туризм йоллары акында айтылды, олар «Хадж зиярат-туризм» деп аталадылар. Узбекистаннан келген конаклар бизди оьз ерине шакырдылар, мен оларга бизим районымыз акында хабарладым, «Конак уьй» орталыгына бизим халкымыздынъ маданияты, аьдетлери, тарихи мен таныспага шакырдым, – деп оьз ойлары ман боьлисти «Шоьл тавысы» республикалык газетасынынъ корреспонденти мен Г. Эсмухамбетова.