«Балады мектебке аьзирле» саваплык акциясы, ийги аьдетке кирип, савлай элимиз бойынша оьтеди. Ол Янъы окув йылы алдында озгарылады эм авыр яшав аьллерине туьскен балалар акында (коьп балалы аьеллерден, сакат балалар, колайсыз яшайтаган аьеллерден, согыс спецоперация катнасувшылар, Россиядынъ янъы регионларыннан балалар) каьр шегуьвге каратылган.
Акциядынъ бас мырады – балаларын янъы окув йылына аьзирлевде финанс ягыннан авырлык сезетаган аьеллерге ярдам этуьв.
Билимлер куьни алдында бу ак ниетли саваплык акциясы Дагестан Республикасы еринде де оьтти. ДР Оькиметининъ Председатели Магомед Рамазанов, акцияда ортакшылык этип, мектебке биринши кере бараяк 25 балаларга окув аьрекетинде керекли канцеляриялык алатларга (тептерлер, калем, карандаш, пенал, альбом, бояклар эм сондай баска) толган янъы портфельлер тапшырды.

«Балады мектебке аьзирле» акциясын колтыкладылар Ногай районында да.
Билимлер куьни алдында Ногай район Депутатлар йыйынынынъ председатели Алибек Менласанов Батыр-Мурза авылыннан коьп балалы аьелиннен мектеб босагасыннан аьлемет билимлер дуныясына биринши кере абыт этеек Айша Суюндуковага канцелярия алатлары ман янъы ранец савкатлады. Ол белгилегенлей, балалар акында каьр шегуьв – баьримиз алдында турган приоритетли борыш, эм аьр бала оьзин сенимли сезсин эм янъы окув йылына толысынша аьзир болсын уьшин колдан келген баьри зат этилмеге керек.
Белгилеп озайык, бу саваплык акциясында муниципалитеттинъ администрациясы, онлаган организациялар, ямагат союзлар, солай ок айырым аьдемлер ортакшылык эттилер.
Район етекшиси Джамалутдин Эсиргепов балаларды янъы окув йылына аьзирлик коьруьвге каратылган бу саваплык акциясына белсенлик пен кирисип, кайбир аьеллер балаларын колтыкламага шакырув этти. Муниципалитет етекшиси 1-нши сентябрь куьни мен А.Ш.Джанибеков атындагы Терекли-Мектеб авыл мектеби меканына биринши абыт алып киреек Фатима Ярлыкаповады кутлап, ога окувда уьстинликлер йорады, балаларды мектеб йыллары йолынынъ басында колтыклавдынъ маьнелигин белгиледи. «Биринши класс – аьр баладынъ айырым яшав болжалы. Эм ол суьйиниш пен, янъы ашылувлар ман эм оьз куьшинъе сенимлик пен бийленгенин йорайман», – деди ол.
Йыл сайын Ногай районынынъ Хатын-кызлар совети «Балады мектебке аьзирле» деген акцияда ортакшылык этеди. Быйыл Дагестан Хатын-кызлар советининъ председатели Х.Валиева Ногай районына 10 портфельлер йиберген, солардынъ ишинде калем, тептерлер, карандашлар эм баска алатлар бар. Бу коьмек коьп балалы, колайсыз аьеллерге, СВО катнасувшыларынынъ балаларына этилинеди, биринши класска баратаган саьбийлерге сондай суьйиниш савгаладылар.

 
Бизим бас борышымыз – балаларды коьтергишлев. Акцияда катнасувымыз – СВО еринде эр борышын толтырып турган йигитлеримиздинъ балаларына да ярдам этуьв. Ата-аналар эм саьбийлер бек разы болдылар, баьрисине де савбол айттылар.
Айырым савбол спонсорларымызга айтув керек – предприниматель Т.Байманбетовка, Ногай районынынъ кулланув газовый службасынынъ етекшиси Ш.Акболатовка, предприниматель, яслар палатасынынъ агзасы Д.Кузеевага.
Бу саваплык акциясында катнаскан баьрисине де разылык билдиремиз. Янъы окув йылында балаларымызга уьстинликлер йораймыз.