Сонынъ акында 25-нши октябрьде Дагестан Аькимбасы Сергей Меликовтынъ етекшилиги мен оьткерилген республика еринде янъы коронавирус юкпалы маразынынъ таралувына карсылык этуьв бойынша Оперативлик штабынынъ кезексиз йыйынында билдирилген.

Республикада 28-нши октябрьден алып бир неше объектлерге эм шаралар оьткерилетаган ерлерге аьдемлерди йиберуьв уьшин QR-кодлар киргистилгенлер. Оннан алдын ДР Савлык саклав министри Татьяна Беляева регионнынъ яшавшыларына каратылган соьзинде медициналык учреждениелерине куьн сайын COVID-19 маразына усаган авырувлар ман 200-ге ювык аьдем туьсетаганы акында билдирген.
Сондай йорыкты киргистуьвге Россия Президенти Владимир Путиннинъ РФ Оькимет агзалары ман элде коронавирус маразы ман байланыста туьзилген аьллер бойынша оьткерген кенъестен сонъ федераллык оьлшеминде кабыл этилинген карарлар себеп болганлар.
Оперативлик штабынынъ йыйынында Дагестан Аькимбасы патшалыктынъ етекшиси оьзининъ указы ман 30-ншы октябрьден 7-нши ноябрьге дейим баьри де экономика эм халк хозяйствосынынъ тармакларында сондагы куллыкшылардынъ кыйын аклары сакланувы ман ислемейтаган куьнлерди токтастырганын белгиледи.
«18-нши октябрьде оьткерилген Оперативлик штабынынъ йыйынында колайсыз эпидемиологиялык аьллердинъ туьзилуьвин эсапка алып, биз бир неше тыювлар, сонынъ санында 28-нши октябрьден баслап бир неше объектлерге эм шаралар оьткерилетаган ерлерге вакцинация этилингени яде коронавирус пан авырыганы акында шайытлайтаган QR-кодлар бойынша аьдемлерди киргистуьв акында карар алганмыз», – деп белгилеген Сергей Меликов.
Соны ман байланыста келуьвшилер уьшин майданлары 400 квадрат метр оьлшеминнен артатаган тамак-азык товарларын сатпайтаган савда орталыкларында, ямагат тамакланув заведениелеринде, театрларда, кинозалларда, спорт орталыкларында, фитнес-залларында, ыспайлык салонларында эм баска туьрли ерлерде тыюв шаралары киргистилгенлер.