Оьткен юмада ДР Коьлик эм йол хозяйствосынынъ министри Джамбулат Салавов, ДР Авыл хозяйство эм азык-туьлик министри Мухтарбий Аджеков пан бирге ис йорыгы ман Ногай районында конакта болганлар.

Д.Салавовтынъ айтувы ман, олар муниципалитетке Дагестан Оькиметининъ Председатели Абдулмуслим Абдулмуслимовтынъ тапшырувы бойынша район ериндеги республикалык эм районлар ара автомобиль йолларынынъ аьллерин тергемеге, солай ок авыл хозяйство тармагындагы соравларды ойласув ниет пен келгенлер.
«Биз Мухтарбий Аджеков эм район етекшиси Джамалутдин Эсиргепов пан Тарумов эм Ногай районлар ара административлик япсардан республикалык йол ман Ставрополь крайынынъ япсарына дейим оьттик. Сонда йолдынъ ярастырув керегетаган ерлерин оьз коьзимиз бен коьрдик, Биз автойолдынъ районга киретаган ерин (ол ушыны ман да ярастырувды талаплайды) тийисли аьлге келтируьв акында карар алдык. Солай ок йолдынъ районга киретаган ерин эм район орталыгы Терекли-Мектебтинъ орталык орамы ишин ярыкландырувды 2024-нши йылдынъ ис планына киргистеек болдык. Соны ман бирге биз районнынъ айырым авыллары, Карагаста, Кумлыда, Ставрополь крайына киретаган япсарда болдык, сондагы йолдынъ баьри кавыфлы ерлерин де тергедик.
Биз солай ок район яшавшыларынынъ, район етекшисининъ эм авыл аькимбасларынынъ, депутатлардынъ шакырув эм кенъеслерин де тынъладык», – деген сонъында бизим хабаршымызга Д.Салавов.
Авыл хозяйство эм азык-туьлик министри Мухтарбий Аджеков районнынъ фермерлери мен ис йолыгысларын оьткерген. Сол йолыгыслар аьсеринде министр шегертки мен куьрес юритуьв ислерининъ барувын ойласкан, бийдай, мамык оьсетаган эгин кырларды карап шыккан.
Бизим хабаршы.