Соьйтип, уьйкен этип язылган язувы болган плакат илип, авыл маданият уьйининъ каралдысы ярасык шешекейлер, Чернобыль атом электростанциясы атылганнан сонъ, сонынъ калдыкларын тайдырувда катнаскан ердеслеримиздинъ суьвретлери салынып, аьзирленген баннер де коьзге туьсип, келген конакларды Орта-Тоьбе авыл яшавшылары йолыктылар. Бу куьн конак болып, Ногай районымыздынъ баьри авылларыннан да, сол 35 йыл артта болган казады басларыннан оьткерген, тувра ортасында болган, бизим келеектегимиз, буьгуьнги яшавымыз уьшин ислеген аьдемлер эдилер.
Чернобыльшилерге багысланган йолыгысты Орта-Тоьбе авыл маданият куллыкшылары Мавлимберди Кишинеев пен Зульфия Оразова юриттилер.
– Чернобыль – бизим дайымлык эсимиз эм авырувымыз, сол бизим тарихимиздинъ мутылмаяк бетлери. Бу казадынъ болувы ман Припять каласы янсызланды, мунда савлай яшав соьнди, сонда яшаган аьдемлер, сав калганлар, уьйлерин таслап кетпеге керек болдылар. Кала яшавшылары уьйлерин калдырып кеткеннен сонъ, сол атомлы электростанциясынынъ калдыкларын тайдырмага барганлар санында бизим ердеслеримиз де бар эди. Бу куьн биз олардынъ алдында бас ийип, оьз разылыгымызды билдиремиз,- деп баслады оьз соьзлерин юритуьвшилер. Шарадынъ барысында мектеб окувшылары З.Янакаева, Л.Сраждинова, А.Исмаилова казага багысланган ятлавлар окыдылар, А.Оразов «Ногай халкым, салам» йырын йырлады, ЧАЭС калдыкларын тайдырувда катнаскан, тек неге болса да, аты бир ерде де коьрсетилмеген, ама онынъ янында, оны ман бирге болган шайытлар бар, Уьйсалган авыл яшавшысы Мольдин Аджиковтынъ инисининъ увылы, онынъ атын юритетаган кишкей йигит Мольдин Аджиков пан занъыраган тавыслы Кельдимурат Боршакаев ногай сазын домбырада шалдылар.
Шарага буьгуьнги баьтирлер мен бирге шакырылган «Ногайский район» МР администрациясынынъ аькимбасынынъ орынбасары Баймагомед Ярлыкапов, Ямагат палатасынынъ председатели Эльмурза Саитов, Согыс эм ис ветеранлар советининъ председатели Акманбет Сангишиев, Орта-Тоьбе авыл поселениесининъ аькимбасынынъ орынбасары Исраил Нурманбетов, ЧАЭС калдыкларын тайдырувда катнаскан Асанбий Тилековтынъ тул хатыны Касират Тилекова, Уьйсалган авыл маданият тармагынынъ куллышысы Альмира Менглибаева соьйледилер, олар аьр бир чернобыльшиге оьз разылыгын билдирдилер. Солай ок, бу куьн тагы бир чернобыльши Байрам Эрежеповтынъ карындасы Райхан Аджиниязова оьзининъ аданасын эсине алып, йиени Камилла Менгласановадынъ, нагашакасына багыслап язылган, ятлавын окып эситтирди.
Бу куьн Ногай районы бойынша Чернобыльшилер союзынынъ председатели Руслан Кунтувгановка соьз берилгенде, ол ак юрегиннен сондай шара уйгынлаганларга савболсынын айтты эм чернобыльшилерге багысланган шараларда ортакшылык этетаган кишкей Лейла Сраждиновага грамота ман эстеликке савга тапшырды.
Шара маданият уьйининъ алды бетинде орынласкан чернобыльшилерге эстеликке гуьл шешекейлер салынув ман тамамланды.
Г.Курганова.
Суьвретте: эстеликке гуьл салынады.
