Ногай районынынъ авыл орта мектеблеринде, авыл китапханаларында халкымыздынъ белгили ногай халк язувшысы, ногай адабиатынынъ негизин салувшыларынынъ бириси Фазиль Апасович Абдулжалиловтынъ 110 йыллыгына багысланган шаралар озгарылып барадылар.
Сол ниетте Ногай районынынъ С.И.Капаев атындагы Калининаул орта мектебинде авыл китапханасы ман бирге ногай язувшысы, драматург, шаир Фазиль Абдулжалиловтынъ сыйлы мерекесининъ эстелигине багысланган, «Эстелик саьати» деп аталып, яратувшылык кешлиги уйгынланып оьтти.
Шарады ногай тил эм адабиат дерисиннен окытувшысы Рамзия Акбердиева, мектеб окувшылары Д.Абдулсаметова, Р.Казгереева юриттилер.
Шарада ногай совет адабиатынынъ негизин салувшысы, 26 китаплерининъ иеси, яратувшылык дуныясы бай эм кызыклы болган, тил шеберлиги мен окувшыларды оьзине тарткан белгили Фазиль Апас увылы Абдулжалиловтынъ яшав йолы акында Калининаул китапханасынынъ куллыкшылары Авасхан Кульниязова, Гульжаминат Янгазиева йыйылганларга хабарладылар.
Оьнерли язувшыдынъ язган шыгармаларыннан мектеб окувшылары ятлавларын яттан окып, онынъ соьзлерине салынган йырларын йырлап эситтирдилер, ятлавларын сахнага шыгарып коьрсеттилер. Айтпага, Калининаул орта мектебининъ окувшылары – 8-нши класс окувшысы Р. Арсланова – «Танъ сес берген», С. Биякаева – «Эсик эм Тесик» баснясын, З.Туркменбаева – «Кыс келди», А.Искакова, Р.Нурадилов, З.Туркменбаева «Ятарбек» деген ятлавларын сахнага шыгарып оьнерли коьрсеттилер. З.Тулашева – «Кавказым»,10-ншы класс окувшысы А.Куруптурсунова «Халктынь увылы Халмурза» деген баллададан уьзикти окымыслы окып эситтирди.
«Буьрленсинлер бизде бавлар» деген автордынъ соьзлерине язылган йырын окувшылар куьби йырлады. Оьзининъ конъырав сеси мен «Дагестаннынъ яны» деген баргысынынъ лауреаты Бегали Куруптурсунов ярасыклы сеси мен йырларын йырлап шарага коьнъил косты.
Соьйтип, ногай адабиатынынъ негизин салувшыларынынъ бириси Фазиль Апасович Абдулжалиловтынъ 110 йыллыгына багысланган шара окувшыларга пайдалы эм кызыклы аьлде уйгынланып оьтти.
Г.Нурдинова.
Суьвретте:шарадан коьринис.