Уллы Аталык согысы басланган куьн календарь бойынша июнь айынынъ 22-нши куьнинде белгиленеди. Сол куьннинъ белгиленуьв шаралары ишинде, уьстимиздеги йылдынъ канътар айынынъ оныншы куьнинде согыс спецоперациясында ян берген ердесимиз Вячеслав Максидовтынъ яшаган уьйинде мемориаллык тактасы ашылды.
Ол, авылдасларынынъ айтувы ман, айлак яслай аьскерши болмага мырады бар болган экен. Оьзи Терекли-Мектеб авылынынъ А-Х.Джанибеков атындагы орта мектебин окып битирген. Аьли болса, Вячеслав оьзининъ эр борышын йигитлерше толтырганлар санында.
Бу куьн ол яшаган уьйдинъ азбарында мемориаллык тактадынъ ашылувына багысланган митинг болып озды.
–Буьгуьн –бек маьнели куьн. Биз, согыс спецоперациясында йигитлерше ян берген ердесимиз – Вячеслав Владимирович Максидовтынъ эстелигине багысланган мемориаллык тактасын онынъ балалыгы эм яслыгы озган уьйге саламыз. Айырым разылыгымызды онынъ анасына айтпага суьемен, ол оьз элининъ патриотына яшав оьмирин савгалаган. Йигит болып бирев де тувмайды, оннан сонъ, оьз ислери мен сол атты казанадылар. Бизим бас борышымыз – Вячеславтай аьдемлердинъ йигитлигин, эрлигин эм йигерлигин данъклав эм эсимизде саклав, – деди «Ногайский район» МР администрациясынынъ ислери мен етекшилейтаган Насипхан Джумаева.
Оннан сонъ, бу оьзгерисли шарада Вячеславтынъ авылдасы, оьзи Уллы Аталык согысынынъ ветеранлары Абдуразаковлардынъ увылы эм уныгы Тахир Казманбет увылы да оьз ойын айтып, атасынынъ айткан бир хабары ман боьлисти.
–Националистлер кайсы заманларда да болганлар. Уллы аталык согысы озатаган шакларда да олар оьз ислерин эткенлер. Оларды туьп -тамыры ман йоймай турып, биз етимислерге етисип болмаймыз, неге десе олар да оьз тамырын йибередилер, деп айтатаган эди атам Казманбет, – деди ол.
Шарада ортакшылык эткен «Ногай район» МР администрациясынынъ ямагат палатасынынъ председатели Эльмурза Саитов, «Ногайское лесничество» етекшиси Феруза Дикинова, «Минмелиоводхоз» ФГУ етекшиси Сафар-Али Сарсеев те оьз ойлары ман боьлистилер.
Украина япсарларында йигитлерше ян берген СВО катнасувшысы, ердесимиз В.Максидовтынъ эстелигине багысланган мемориаллык тактасын ашпага ыхтыяр онынъ ювык кардашларына берилди.
– Мемориаллык такта бу ерден юрип озган аьдемнинъ эсин каратаяк эм аьр бирисине бу уьйде СВО катнасувшысы яшаганынынъ шайыты болаяк. Вячеслав Максидовка –дайымлык эс. Биз оны мутпаякпыз бир де, – деди оны балалай коьрген авылдасы Шамиль Савкатов.
Мемориаллык тактага биринши болып гуьл байламларын конаклар салдылар эм ердесимиздинъ эстелигине бир такыйка уьндемей турдылар.
Йигит акында эс оьмирлерге яшаяк. Ким биледи, кашан болса да, Ногай районымыздынъ бир авылында яде орталыгымызда онынъ атын юриткен орам яде бир билимлендируьв учреждение болар. Оны заман коьрсетер…
А буьгуьнлерде болса, биз сондай ясларымыздынъ йигитликлери мен оьктемсиймиз. Олар бизим балаларымыздынъ келеектегиси уьшин яс яшавларын бергенлер. Сол зат мутылып болмайды.
Г.Курганова.
Суьвретте: Мемориаллык такта ашылган шактан.
