Буьгуьнлерде савлай дуныя маразды енъуьв ниет пен коронавируслы инфекциядан вакцинация исинде катнасып, сол амалдынъ маьнели эм керекли экенин анълап туры. Соьйтип, Ногай районында да вакцинация оьтуьвининъ ийги сырагылары аянланады деп айтпага боламыз.

Куьнбатар авыл администрациясынынъ аькимбасы Замид Яриков «Шоьл тавысы» республикалык газетасынынъ корреспонденти мен бу сорав бойынша оьз ойлары ман боьлисти.
– Эки йылдан бери яман мараз бизим яшавымызга кирип, парахатлыкта яшамага буршав этип турады. Буьгуьнлерде, оькинишке, ювыкларымызды, авылдасларымызды йойытып турганымыз баьримизге де кайгылы. Мен ойлайман, эгер аьр бир гражданин оьз борышын толтырып, вакцинацияды заманында оьткен болса, сондай йойымлар да болмаяк эди. Мен вакцинады яй куьнлеринде оьттим. Куьнбатар авылынынъ 610 яшавшылары вакцинады эттирдилер, аьлиги заманда да вакцинация иси бардырылады.
Вакцинация ден савлык саклав ниет пен этилинетаганын биз баьримиз де анъламага керекпиз. Маразды енъуьв уьшин биз биргелеспеге керекпиз. Роспотребнадзор управлениеси, патшалык властининъ органлары эткен талаплавларга маьне берип, толтырув керекпиз, – деп айтады оьз ойын авыл басшысы.