«Единая Россия» Савлайроссиялык партиясынынъ 20 йыллыгына багысланып озгарылатаган гражданларды кабыл этуьв региональлик юма ишинде Ногай районында РФ Федераллык Йыйынынынъ Государстволык Думасынынъ депутаты Бийсултан Султанбиевич Хамзаев пен йолыгыс озгарылды. Мунда, бизим район ерине, онынъ бу уьшинши келуьви, аьдемлер оны таныйдылар эм куьтип турадылар.

Ис куьнделигин Бийсултан Хамзаев район гражданларын кабыл этуьвден баслады. Биринши болып федераллык депутат пан Терекли-Мектеб авыл аькимбасы Зейдулла Аджибайрамов йолыгысты. Ол район орталыгында оьткир маьселе – сув кытлыгы акында айтты. Онынъ айтувы ман, мунда совет заманлардан алып казылган 23 артезиан эки кереге оьскен район орталыгын ишерлик сув ман канагатлап болмайды.

– Баьри район орталыгында сув ман канагатлав бирдей тармакты курув мундагы янъы микрорайон яшавшыларынынъ соны ман байланыслы маьселесин шешуьвге себеплик этеек эди, – деди ол.
Бийсултан Хамзаевтинъ белгилеви мен, ызгы заманда республикады ишерлик сув, электроярык эм газ бан канагатлав ман байланыслы маьселелер шешилмеге керек бас маьселелер эсабында турады.
– Бу маьселелер буьгуьнде тувмаган. Олар йыллар бойы йыйылганлар эм шешилмей турганлар, ама буьгуьн Дагестан Аькимбасы Сергей Меликовтынъ демевлиги мен олар шешиледилер. Бирденнен тувыл, ама бу яктан ислер илгерили барады, – деди Бийсултан Хамзаев эм оьз ягыннан колдан келген коьмегин тийгистпеге соьз берди.
Сонъ депутаттынъ эсин Шуьмлелик авыл мектебининъ директоры Омаргаджи Шахбанов эм Уьйсалган авыл яшавшысы Шагидулла Торпиков караттылар. Экевининъ де тилеги бир эди – бу эки авылда балалар бавларын салувга себеплик этуьв. Ш.Торпиковтынъ соьзлерине коьре, балаларды Дагестаннынъ энъ сырт авылы Уьйсалганнан (ол Ставрополь крайы ман япсарланып орынласкан) сол крайдынъ Курской авылына элтемеге туьседи. О.Шахбанов авылда демография оьсетаганы акында билдируьв мен депутатты суьйинтти, тек авылда саьбийлер уьшин балалар учреждениеси йоклыгын белгиледи. Шуьмлелик авылында даргин миллетининъ ваькиллери яшайдылар, олар Дахадаев районыннан Ногай шоьлине оьткен оьмирдинъ 70-нши йылларында коьшип келгенлер.
Йолыгыста катнаскан Ногай районынынъ аькимбасы Мухтарбий Аджеков эндиги йылда Шуьмлелик авылында 200 орынга эсапланган мектеб курылысы басланаягын белгиледи.
Эки соравды да Бийсултан Хамзаев оьз тергеви астына алды эм оьз ягыннан ярдам этеегине соьз берди.

Районнынъ балалар-оьспир мектебининъ тренери Камиль Бекмурзаев парламентарийге районда физкультура-савланды- рув комплекси йок экени акында билдирди. Терекли-Мектеб авылынынъ баска яшавшысы Оразбай Дуйсенбиев район орталыгынынъ Победа микрорайоны еринде мини-футбол майданын курувга себеплик этпеге тилек салды. Бийсултан Хамзаев ийги яшав кеп пен байланыслы баьри затты яклайтаганын билдирди эм оьз коьмекшилерине бу соравларды терениннен ойласып, олардынъ шешуьв йолларын излестирмеге тапшырды.
Белгилев керек, депутат Бийсултан Хамзаев басшылайтаган «Трезвая Россия» Федераллык проекти бойынша Ногай районында бир неше воркаут-майданлар, солай ок балалар майданлар салынган.
Депутатка оьз соравлары ман келгенлер коьп эди. Соравлар – Ногай ЦРБ-да врачлардынъ етиспевлиги, уьйшиликте шыккан калдыкларды йыюв эм оларды асыллав ман байланыслы маьселелер эм сондай баскалар. Баьри соравлар бойынша тийисли токтаслар алынаягы билдирилди.
Сонъ депутат Бийсултан Хамзаев район активи мен йолыгысты. Йыйылганлар депутатты карс кагувлар ман йолыктылар, неге десе эки ай артта онынъ уьшин тавысларын берген сайлавшылар ман бу онынъ биринши йолыгысы эди.
Муниципалитеттинъ аькимбасы М.Аджеков, заманы етис- певлигине карамастан, Госдума депутаты Бийсултан Хамзаев бизим районнынъ сайлавшылары ман йолыгысувга бир куьнин багыслаганын белгиледи эм оьз разылыгын билдирди.
Армаганда Б.Хамзаев сайлавшыларга Государстволык Думасында оьзининъ аьрекети акында кыскаша хабарлады.
– Депутатлар оьз регионларына барып, сайлавшылар ман, олар бийик тав авылында болсын, шоьл ерининъ шетинде болсын, йолыгыспага борышлылар эм оларды тынышсызландыратаган маьселелерди федераллык дережеде коьтермеге кереклер. Законлар халк уьшин ислемеге керек, – деди Б.Хамзаев.
Сонъ шыгып соьйлеген Ногай район администрациясынынъ Ямагат палатасынынъ председатели Эльмурза Саитов экология акында соравды коьтерди, коьп ерлер кумлакка айланганы акында айтты, сол маьселеди федераллык дережеде коьтермеге тилек салды.
Районнынъ Ясуьйкенлер Советининъ председатели Рашид Мурзагишиев сав дуныяга белгили болган, савлай Совет Союзында йыныслы койлар оьстируьв мен данъклы Червленные Буруны Госплемзаводтынъ буьгуьнги осал аьли акында айтты.
Бу эки сорав депутаттынъ байыр тергеви астында турганы район активин суьйинтпей болмады. Хамзаев бу соравды, толысынша ортага салып, авыл хозяйствосы бойынша федераллык министр мен ойласув уьшин авыл хозяйство куллыкшылардан делегация туьзбеге маслагат берди.
Йолыгыста Бийсултан Хамзаевке «Ногай районынынъ сыйлы гражданини» деген шайытлама эм белги тапшырдылар.
Сонъ Эльмурза Саитов халк пан сондай йылы йолыгыс эм хабарласув коьптен бери болмаганын белгиледи.
– Мен Бийсултан Султанбиевичке Госдумада бек оьткир маьселелер коьтеретаганы уьшин бек разыман. Бирерде ол каты соьйлейди, ама дурыслык акында баскаша айтпассынъ. Коьлемлик информация амалларында кыянатшылардынъ миллетин белгилемеге керек тувыл дегенин яклайман. Кыянатшыдынъ миллетлиги йок. Биз, ра- йон яшавшылары, оьз депутатымызга ынанамыз эм бизим маьселелер федераллык дережеге етер деп сенемиз, – деди ол.
Бийсултан Хамзаев солай ок медкуллыкшылар ман йолыгысты эм олар ман да хабарласты. Солай ок Хамзаев балалар футбол командасынынъ тренировкасында болды эм балалардынъ аяк кийимлерин коьрип, оларга бутсылар эм спорт кийимин алмага соьз берди.
Госдума депутаты ясуьйкенлер несилининъ 200 ваькиллерин де суьйинтти, оларды «Шоьл тавысы» газетасына яздырып.
Депутаттынъ программасынынъ энъ сонъгы коьп балалы аналарга каратылган кутлав соьзлери эди.
Соьйтип йогары коьнъилликте озды РФ Федераллык Йыйынынынъ Государстволык Думасынынъ депутаты Бийсултан Хамзаевтинъ Ногай районында оьткен куьни.
бизим хабаршы.
Суьвретлерде: РФ Федераллык Йыйынынынъ Госдумасынынъ депутаты Бийсултан Хамзаев Ногай район еринде.