Дагестан Аькимбасы Сергей Меликовтынъ етекшилиги астында 7-нши декабрь куьнинде Ковид-19 пан куьрес юритуьв бойынша Оперативлик штабынынъ кезекли кенъеси болып озды. Онда яшавшылардынъ коронавируска карсы вакцинациялавы бойынша бир неше соравлар ойласылды.

Кенъес барысында Савлык саклав министерствосы эм Роспот- ребнадзор ман регионда бу кавыфлы маразы ман байланыслы эпидемиологиялык аьл авыр болып калатаганы белгиленди.
Авырув бойынша коьрсеткишлер тоьмен болса да, экинши яктан караганда, авырувдан савболганлардан да бек оны юктыратаганлар саны артады.
Савлык саклав министерстводынъ куьндегилик эсап беруьвлерде коьрингенлей, авырган дагестаншылар куьн сайын оьледилер.
Регион етекшиси медиклер бу куьнлерде 47 авыр аьлдеги пациентлер уьшин куьресетаганын белгиледи.
Аьли янъы «Омикрон» деген коронавирус штампы бары аянланды. Федераллык дережеде ПЦР-тест озгарувын 72- ден 48 саьатте дейим кемитуьв акында токтас алынды. Сонынъ уьшин регион етекшиси эки куьн ишинде сол акта оперштаб пан алдын алынган нормативлерге туьрленислер киргистпеге тапшырды.
Медиклер ызгы юма ишинде 66493 тергевлер эм 100 мынъ яшавшыларга 307,8 тестлер озгардылар, ол федераллык дережеде токтастырылган оьлшемге яваплайды.
Соны ман бирге кайбир районларда, айтпага, Цунтинский, Гергебильский, Лакский, Гунибский, Гумбетовский эм Акушинский, солай ок Дербент, Каспийск эм Избербаш калаларда тергевлер юритуьв коьрсеткишлери тоьмен экени белгиленди.
Сергей Меликов йогарыда айтылган муниципалитетлердинъ аькимбасларына сол затка эс каратпага кереклигин белгиледи.