WorldSkills – ол кеспи усталыгынынъ ярыслары, олар исши кеспилердинъ абырайын коьтерер ниетте озгарыладылар. Савлай дуныяда ярыслар WorldSkills International халклар ара организациясы ман уйгынланадылар, онынъ аьрекетинде 77 эл ортакшылык этеди.

«Яс профессионаллар» WorldSkills Russia – 2021 VI кеспилик усталыгынынъ регионаллык чемпионатынынъ енъуьвшилерининъ, катнасувшыларынынъ эм экспертлерининъ шатлыклы савгалавы С.Орджоникидзе атындагы машиностроение эм сервисининъ республикалык колледжинде оьтти.
Шарадынъ конакларын эм катнасувшыларын колледждинъ етекшиси Магомедрасул Муслимов хошлады. Ол озган базласлар чемпионатлардынъ хайырын коьрсеткенин эм катнасувшыларга оьзлерининъ усталыгын, оьнерлерин коьрсетпеге амал бергенин белгиледи. М.Муслимов Дагестанда Ворлдскиллс базласларын уйгынлавшыларга оьз разылыгын билдирди эм ДР ис эм социаллык министри Изумруд Мугутдиновага яслар сырасында исши кеспилерди таралтув соравларына эс эткенине савболсын айтты.
Енъуьвшилерди «Успех» республикалык ис пен канагатлав яслар орталыгынынъ етекшиси Тамерлан Буганов та кутлады. Ол Регионаллык чемпионатынынъ катнасувшыларына кеспилик уьстинликлер, сайлаган кесписине алаллыкты эм янъы енъуьвлерди йорады.
Шатлыклы шарадынъ конаклары эм катнасувшылары уьшин колледждинъ студентлери концерт уйгынладылар.
«Яс профессионаллар» WorldSkills Russia – 2021 VI кеспилик усталыгынынъ регионаллык чемпионаты Дагестан Республикасында навруз айында 63 компетенция бойынша Россия Федерациясынынъ субъектлерининъ ваькиллерининъ катнасувы ман оьтти.