Бу куьнлерде мен савлай аьдемликтинъ, аьр бир ер юзининъ яшавшысынынъ эсин согыс спецоперациясы каратады деп айтсам, аз болса да, янъылыспаягымды билемен.
Бир йылдан артык заман артта, Россия Федерациясынынъ Президенти Владимир Путин элимиз бойынша мобилизация басланувы акында буйырыгын бергенде, эр кисилердинъ коьбиси оьз колларына савытлар алып, Элди коршалавга шыкты.
Бизим Элде сондай кыйынлы заман болар деп бир аьдем де ойланмаган болар, ама болды… Бизим куватлы эр кисилеримиз, мобилизация бойынша кеткенлер болсын, аьскершилер болсын, буйырыкты алганнан сонъ, согыс спецоперациясы озатаган япсарга йол алдылар, неге десе солай этпеге керек.
Бизим ердесимиз Михаил Гилев оьзининъ ис аьрекети бойынша СВО катнасувшысы болады. Ол – аьскерши.
Михаил Терекли-Мектеб авылынынъ Кадрия атындагы мектебинде билим алганнан сонъ, Пермь каласындагы Россия МВД-сынынъ иш аьскершилер институтынынъ техникалык канагатлав факультетине окымага туьседи.
Аьскершидинъ кесписин алган йигит оьзининъ ис аьрекетин Астрахань каласында баслайды.
Согыс спецоперациясы басланганша ол ис аьрекетин бардырган аьскер боьлигинде автобронетанковый службасын етекшилейтаган эди. СВО япсарларында болса, савытланув бойынша куьшлендируьв тактический куьбининъ етекшисининъ орынбасарынынъ ис аьрекетин кесек заманга юритеди.
Ердесимиз Михаил армия эм аьскер службасына кайдай баа береди эм ол аьскер службасы дегенди кайтип анълатады?
Онынъ билдируьвине коьре, армия – баска дуныя. Сонда оьзининъ йорыклары эм тутылмага керек тийисли кагыйдалар бар.
Кыскаша айтканда, армия – патшалыктынъ ишинде патшалык, кайда уйыспага эм уьйренмеге тыныш тувыл.
Аьскер сырасына туьскен аьдем ойланып баслайды, онынъ ойлары да, яшавга карасы да туьрленеди. Аьскерши болган аьдем сол яшавдынъ маьнесин анълайды. Энъ де кызыклысы сол, коьбиси эр кисилерге, бир неше йыллар сол борышты толтырувдан коркып юргенлерге, бу ис аьрекет айлак куьшли ярап та баслайды.
Михаил Александровичке оьзининъ сайлаган кесписи бек ярайды.
Михаил согыс спецоперациясында биринши куьниннен алып оьзининъ ис борышын толтырады. Михаилдынъ анасы Марина Сагнаева оьзининъ увылы ман бек оьктемсийди, онынъ соьзи мен, ол согыс спецоперациясында биринши куьннен алып катнасады эм соннан бери уьйге эки кере келип кетти.
– Бизим борышымыз ийгиликке эм бир келип кетуьвден экинши келуьвге дейим Кудайымызга сенуьв болады, – дейди Марина.
Кыйналады увылы уьшин ол, ама сайлаган кесписине алаллык болмага керегин де бек аьруьв анълайды. Михаил бу кеспиди оьз ыхтыяры ман сайлаган, онынъ ис аьрекетининъ бас борышы – Элди коршалав.
Михаилдынъ балалыгы эм яслыгы Ногай районымыздынъ Терекли-Мектеб авылында оьткен. Кадрия атындагы орта мектебинде ога биринши окытувшысы Гульсагира Абдулкадырова патриотизм сезимлерин, элине суьйимди коьндирген деп айтпага боламыз. Класс етекшиси Ису Османовна Сулейманова болса, оларды берген соьзге табылып болмага керек деген яваплыкка уьйретип келди.
Михаилды окып кутарган Кадрия атындагы мектебининъ окытувшылары бек каьмбил, ясуьйкенди сыйлап билетаган окувшы этип эслеринде саклайдылар.
– Биз аьр бир окувшыга оьзимиздинъ суьйимимизди берип, аьдилликти коьндирип, тербияламага шалысамыз. Оьзек те, алдыда не болаягы бизге белгисиз, оларды мектебтен йолга салаятырганда, аьр бирисине ийгиликти, наьсипли яшавды йорап озгарамыз. Элге яв шапкынлык эткенде, бизим ясларымыз коршалавга шыгып боладылар, – дейди мектеб етекшиси Альфия Акимова.
Михаил Гилев оьзи аьрекетин бардыратаган аьскер боьлигинде ийги ислейтаган куллыкшылар сырасында болады. Сога онынъ алган разылык хатлары, Сый грамоталары шайыт болады. Солардан баска болып, Михаилдынъ уьшинши дережели «За отличие в службе» деген медали, «Участник боевых действий на Северном Кавказе», «Участник парада Победы», «200 лет внутренним войскам МВД России» коькирек белгилери де бар.
Мобилизованный, контрактлы службады бардыратаганлар, аьскершилер, буьгуьнлерде аьр кайсысы да – Элди коршалавшы. Аьр бирисине ден савлыкты, тынышлы ис аьрекетти йораймыз.
Г.Курганова.
Суьвретте: М.Гилев.