Аьскерлер сырасында куллык этетаганлар анълайдылар, олардынъ исинде йигерлик, яваплылык, намыслык касиетлери керекли. Олар уьйде калган аьелин, тувган-кардашларын, савлай элин коршалайдылар.
Равиль Ахмед увылы Аджимуллаев Ногай районынынъ Червленные Буруны авылында татым аьелинде тувган. Саьбийлерин Ахмед эм Сеперхан Аджимуллаевлер намыслы, куллыксуьер этип оьстирген, кишкейлерге тирев болып, ясуьйкенди сыйлап уьйреткенлер. Ялгыз карындасына агалы-инили Аджимуллаевлер аьр заманда да тирев болганлар эм боладылар. Равильдинъ уьйкен агасы Арслан Вольскте согыс училищесин биткен, сонъында Россиядынъ Савытлы Куьшлер сырасында аьрекет эткен, аьлиги заманда ол полковник званиесинде Москва каласында куллык этеди.
Равиль 2005-нши йыл ерли мектебти битирип, Моздок каласында профтехучилищесинде окыган. Сонъында, 2012-нши йыл контрактник болып Россиядынъ Савытлы Куьшлер сырасында кызмет этти. Равиль Аджимуллаев – сержант, боьлик командири. Буьгуьнлерде ол оьз тенълери мен Украина еринде озып турган согыс спецоперациясында катнасады, оьз Аталыгын коршалайды.
Аьскершидинъ анасы Сеперхан Абу кызына увылы СВО сырасында катнасканы – оьктемлик эм соны ман бирге онынъ юреги баласын сагынады, онынъ уьшин тынышсызланады.
– Бизим балаларымыздынъ иси онъ, мен увылым ман оьктемсиймен, атасы ман биз кеделерди кыйынлыклардан коркпанъыз, намыслы болынъыз деп уьйретип турамыз. Эм буьгуьнлерде увылым Равиль Аталыгын коршалап турганы – мага оьктемлик. Кыйынлы заманларда меним дуаларым баламды баьле-казадан саклайды деп билемен, ол да биледи, уьйде оны ата-анасы, тувганлары, аьлейи, кишкей кызлары куьтедилер. Ана куьнине увылым мага савкат этти – уьйге отпускка келди. Мага кайдай уллы наьсип – увылымды кушагыма алмага, – деп хабарлайды Равильдинъ анасы.
Равильдинъ хатыны Насипли Аджимуллаева Червленные Буруны авылынынъ администрациясында ВУС инспекторы болып ислейди, онынъ куллыгы аьскерлер сырасына шакыртылганлар ман байланыслы, сога коьре эр кисидинъ борышы элин саклав экенин ол ийги анълайды. Эгер Аталык шакырса, эр киси атланмага керек. Равиль анълайды, уьйде оны куьтедилер, кишкей кызлары Малика эм Марьяна бек сагынадылар атасын. Аьскершидинъ эгиз карындасы Ралина да бар, эгизлер айырылысувды бек кыйын оьтедилер деп айтадылар, бир-бирисин олар узакта да сезедилер, Ралина аданасы уьйге аман-эсен кайтканын тилеп турады.
– Тувган ерим, Ногай шоьлим, ата-анам, бавырдасларым, аьелим, кырда юргенде мен оларды бек сагынаман, ама элимизди коршаламага керекпиз, неге десе баьриси де таза аспан астында яшамага керек. Соны уьшин мен явды урмага керекпен. Соны уьшин бизим яслар яшавларын курманлык эткен. Соны уьшин биз яшаймыз эм Аталыгымызга куллык этемиз, – деп айтады аьскерши.
Янъыларда Равиль Аджимуллаев «За отличие в службе» III дережели медали мен савгаланды, сондай баргы ман биз оны исси кутлаймыз. Отпусктан сонъ аьскерши куллык этетаган боьлигине кайтаяк. Ога эм баьри элимизди коршалавшыларга таза аспан эм енъуьв мен уьйге кайтканын йораймыз.
Г.Бекмуратова
Суьвретте: Р.Аджимуллаев.
