Бу куьнлерде россия аьскершиси тувган элининъ тынышлыгын эм ийги данъклыгын саклавда турады. Олар болган шаклы, биз де рахатлыкта яшаймыз эм олардынъ эткени мен оьктемсип турамыз. Аьлиги заманларда согыс спецоперациясында коьплеген аьскершилер катнасадылар, сол санда кайсы ерде яшайтаган ногай ясларымыз да бар. Янъыларда Нефтекум районынынъ Тукуй-Мектеб авылында согыс спецоперациясынынъ катнасувшысы Динислам Самутов пан йолыгыс болып озды.
Оьткен йылдынъ увыт айынынъ 24-нши куьни. Россия элинде тынышлык бузылып, баска яшав кеби келген заман деп айтпага болады. Россия аьскершилерине колларына савытлар алып, элдинъ кавыфсызлыгын эм суверенитетин коршалавга шыкпага туьсти.
Россия Федерациясынынъ Савытлы куьшлери Донецк, Луганск Республикаларын, Херсон эм Запорож областьлерининъ тынышлы яшавшыларын яклавга шыктылар.
Бизим Ногай шоьллигимиздинъ яшавшылары болса, дайым ортак кайгыды боьлисип болатаган касиети мен белгили болганнан сонъ, атайларымыздынъ Уллы Аталык согысында коьрсеткен йигитлигин эслерине алып, Эл шакырганнан сонъ, сол коршалавшылар ман бир сырага турдылар. (Аьскерши кесписин сайлаганлар акында соьз тувыл. Олар, оьзек те, оьз борышларын толтырадылар, аьли соьз мобилизованныйлар акында). Оьзи согыс ислерининъ ветераны болып, Динислам Самутов Россия элинде мобилизация басланганлай ок, согыс спецоперациясында катнасувга шакыртылды. Ога дейим Динислам Ингуш Республикасында эр борышын толтырган. Аьскер боьлигинде кызмет кылган шагында ол боьлик командири де болган. Онынъ касиети акында айтатаган болсак, ол: эркли, йигерли, оьз Элин бек суьетаган инсан.
Янъыларда ол кыска болжаллы тыншаювга уьйине келип кетти. Сол заман ол оьзининъ Тукуй-Мектеб авылынынъ мектебиндеги «Асабалык» деп аталган эм оьз аьрекетин бардыратаган музейинде окувшылар ман йолыгысты. Хош келди соьзин Динисламга мектеб етекшиси Х.Янмурзаева айтып, оьз разылыгын билдирди эм – сендей окувшыларымыз бан оьктеммиз, – деди ол.
Бу куьнги йолыгыста соьйлеген аьр бир аьдем оьзининъ муьсиревли савболсынын айтты эм СВО катнасувшыларына – аьр бириси уьйге аман-эсен енъуьв мен кайтканды йорады.
Динисламнынъ биринши окытувшысы Т.Эльгайтарова онынъ мектебтеги биринши абытлары акында хабарлады.
Динислам оьзи окувшыларга, окытувшыларына СВО зонасындагы россия аьскершилерининъ йигитликлери акында хабарлады.
– Аьр бир эр киси оьзине патшалык пан тапшырылган гражданлык борышты – Элди коршалавды толтырмага керек. Биз – эр йигитлердинъ киели борышымыз – оьзимиздинъ яшаган еримиздинъ кызыксынувын яклав эм миллет кавыфсызлык пан канагатлав, – деген насихат соьзин ол окувшыларга айтты. Окувшылар сонъында Динисламга оьзлерининъ соравларын да бердилер, тийисли яваплар да алдылар.
Бу куьн окувшылар оьз коьзлери мен баьтирлер янларында яшайтаганларын коьрдилер.
Йолыгыстынъ сонъында окытувшылар да, окувшылар да келген конакка тез уьйге кайтувды йорадылар.
Россия Эли куватлы эм сонда яшайтаган аьдемлер де дайым енъуьвши болып келеятыр, сога коьре, биз оьзимиздинъ сенимимиз бен, акыйкатлыгымыз бан элди коршалармыз эм, енъуьв тек бизики болар.
Г.Курганова.
Суьвретте: йолыгыстан сонъ.