Билимлендируьв йылы бойынша Шешен Республикасынынъ Шелков районындагы Сары-Су авыл орта мектебинде туьрли-туьрли шаралары оьткерилип келедилер. Сол Билимлендируьв йылына рас барып, онда туьрли язувшылар, шаирлер, аьлимлер мен йолыгыслары озгарылып барады.

Соьйтип, янъыларда Сары-Су авыл орта мектеб окувшыларында ерли мектеби, администрация шакырувы ман ДР-нынъ Язувшылар союзынынъ правлениесининъ секретари, ногай секциясынынъ етекшиси, белгили шаир, коьшируьвши эм публицист Анвар-Бек Оьтей увылы Култаев конакта болып кетти. Белгили ногай шаири бас деп ерли мектеб етекшиси Маржанат Алимхан кызы Елманбетовадынъ кабинетинде оьткерилген йолыгысында Дагестаннынъ Язувшылар союзындагы ногай секциясынынъ ис аьрекети, Дагестанда ногай тилинде баспаланатаган газета, журналлары акында, китаплерде шыгатаган ногай авторларынынъ асарлары акында хабарлады. Оннан сонъ конак шаири мектебтинъ выпускниклери эм окытувшылары ман йолыгысты. Йыйылганларга ерли мектебтинъ ана тили эм адабиатыннан дерис беруьвши Кельдихан Оьмирзак кызы Шамбилова Анвар-Бек Култаевтинъ яшав эм адабиат йолы акында кыскаша билдируьв этти. Сонъ соьз шаирге берилди. Шаир ногай секциясынынъ ис аьрекети акында хабарлап болганнан сонъ, халкымыздынъ атаклы увыллары – Олимпиада чемпионы Альберт Батыргазиев эм «Данък» орденлерининъ толы кавалери Алимхан Асановтынъ акында язган дестанларынынъ уьзиклерин эм сонъгы заманда язган бир неше ятлавларын йыйылганларга окып эситтирди. Ол ногай тилинде Махачкалада Дагестан китап баспасында шыгатаган ногай авторларынынъ йыйынтыкларын эм ана тилиндеги журналларын коьрсетти эм шарага йыйылганлар арасында таралтты.
Йыйылганлар конакты йылы кепте йолыктылар эм оьзлерин кызыксындыратаган бир неше соравларын берип, оларга тийисли явапларын алдылар.
Оннан сонъ шаир Анвар-Бек Култаев авыл яшавшылары ман да хабарласув юритти эм олардынъ хыйлы соравларына яваплады.
З.Шугаипова.
Суьвретте: шарадан коьринис.