Яс аьдем. Онынъ алдында мынъ йоллар. Кайсын сайлаягы тек онынъ колында. Оьзек те, биревлер бакты ша деп айтпага да боладылар. Сога да ынанаман. Бактыдынъ коьп ерлерде уьйкен маьнеси бар.
Бу куьнлерде Кайтарбек Акмурзаев бактысына коьре оьзининъ элин коршалавга шыгып, эр кисиге келисли борышын – явдан тувганларды, аталыкты коршалав. Ол Ногай районымыздынъ Куьнбатар авылыннан Украина еринде басланган согыс спецоперациясында катнаскан биринши йигит эди.
Янъыларда Кайтарбек оьзининъ тувган ерине келип кетти. Эки юмалык тыншаюв куьнлер кайтип кеткенин де анъламай калдылар Кайтарбектинъ ювыклары. Оны тувган-оьскен еринде орынласкан, оьзи билим алган мектебинде хош коьрип алдылар. Мектеб окытувшылары ман окувшылары Кайтарбекти йылы йолыктылар. Йолыгыста оны окыткан окытувшылар бек ийги разылык соьзлерин айттылар. Олар: Вайдат Исмаиловна Янполова, Марина Алемердановна Караева, Сабират Аруновна Байрашева.
Оьзининъ увылы да согыс спецоперациясында катнасатаган Марина Сейдахметовна Саянова да Кайтарбекке разылыгын билдирип, ийги сагынувларын айтып, окувшыларга да олар кайдай кыйын куллыкты этетаганлары акында билдирип, бу куьнлерде патриотизм сезимлери деген не зат экенин анълатып кетти.
М.Курманалиев атындагы мектебининъ етекшиси Тамара Сераждиновна Бариева болса, патриот – ол оьзининъ Тувган элине куллык этпеге, сонынъ уьшин яшавын бермеге керек аьдем экенин айтты. А Тувган эл деген – баьрисиннен де алдын, сонда яшайтаган яшавшылар. Йолыгыстынъ барысында окувшылар Алтынай Суюндикова, Аиша Адильгереева яттан ятлавлар окыдылар, Равиль Мамутов болса, оьз оьнерин йырда коьрсетти.
Кайтарбектинъ тетеси Байрамбике-абай сондай йолыгысты, уныгынынъ сыйына багыслаганлары уьшин, разылыгын билдирип, тынышлыкты, тоьбеде таза аспанды йорап кетти.
Йолыгыстынъ сонъында Кайтарбекти окытувшылар ман окувшылар, оны ман бирге эр борышын толтыратаганларга, хатлар язып, азык-туьлик салып, савгалар аьзирлеп йибердилер.
Кайтарбек Акмурзаевтей ясларымыз аз тувыл, Тувган ердинъ саклыгын коршалавга шыкканлар, ана суьтин аклаганлар. Биз олардынъ баьрисине де аман-эсен кайтканды йораймыз.
Г.Курганова.
Суьвретте: йолыгыс озатаган шагында.