Янъыларда Ногай район администрациясында район аькимбасындагы Ясуьйкенлер советининъ уйгынлав йыйыны болып оьткен.

Йыйында Ногай район аькимбасы Джамалутдин Эсиргепов, район Ясуьйкенлер советининъ председателининъ куллыгын юритуьвши Шатемир Мунгишиев, район Ямагат палатасынынъ председатели Эльмурза Саитов, район Ветеранлар советининъ председатели Акманбет Сангишиев эм аьр бир авылдан келген ясуьйкенлер ваькиллери катнастылар.
Уйгынлав йыйыннынъ куьн йосыгы бойынша сонынъ ортакшылары Ясуьйкенлер советининъ председателин сайлав соравды ойластылар. Сонынъ сырагысында Ногай район аькимбасындагы Ясуьйкенлер советининъ председатели этип Шатемир Мунгишиевти сайладылар.
Йыйыннынъ экинши соравы бойынша Советтинъ председателининъ орынбасары этип Каирбек Межитовты беркиттилер.
Уйгынлав йыйында солай ок 7 аьдемнен район Ясуьйкенлер советининъ президиумы да сайланды.
Соны ман район Ясуьйкенлер советининъ сырасынынъ уьштен бир пайы янъыртылды, советтинъ сырасы 20 аьдемнен туьзилди. Ясуьйкенлер советининъ янъыртылган сырасына муниципалитеттинъ баьри авылларыннан да ваькиллер киргистилди.
М.Юнусов.
Суьвретте: Шатемир Мунгишиев – Ногай район аькимбасында Ясуьйкенлер советининъ председатели.