Уллы орыс шаири Сергей Есениннинъ яратувшылыгы ман биз аьли бала заманымыздан алып танысамыз. Онынъ аты эм соьз оьнери орыс адабиат классиклери арасында дайымга уьйкен сый ман аталады. Былтыр С.Есенин тувганлы 125 йыллыгы ман байланыста Рязань калада «Меним Есениним» деген мектебке дейимги, мектеб окувшылары, студентлер эм окытувшылар уьшин онлайн йорыгы ман Савлайроссиялык (халклар ара катнасувы ман) яратувшылык конкурсы озгарылган.

Сонынъ «Вокал эм анъ яратувшылыгы» деген номинациясында оьзининъ «Меним Есениним» деген куллыгы ман Шешен Республикасынынъ Шелковской авылынынъ 6-ншы классынынъ окувшысы Медина Карасаева да катнаскан. Конкурстынъ сырагылары бойынша янъы 2021-нши йыл алдында ол 2-нши орын уьшин конкурс Дипломы ман савгаланган.
Бу уялшань эм йигерли кызалак етискен уьстинликлери мен мактанатаган эм соларда токталатаган окувшылардан тувыл. Онынъ суьврети аьли ол 1-нши класстан алып Воскресеновский авыл орта мектебининъ Сый тактасында илинип турады. Бос заманларында кызалак суьврет ясамага бек суьеди. Онынъ суьвретлери бир неше кере ерли авыл маданият уьйинде де выставка кебинде салынганлар.
Мединадынъ атасы Азамат уьйиннен узакта Росгвардия офицери болып куллык этеди. Анасы Кистаман – медицина куллыкшысы. Медина аьли де яс эм онынъ алдында баьри йоллары да ашык, ол сонъында кайдай йолды сайласа да, ким болса да, ийги аьдем болаягына сенемиз.
М.Юнусов.
Суьвретте: Медина Карасаева атайы Айнедин мен.