Дагестан Республикасында COVID-19 маразы ман байланыста аьл осалланганга коьре, ДР савлык саклав министри дагестаншыларга санпин йорыкларын тутпага, солай ок вакцинация оьтпеге тилек салды. Онынъ республика яшавшыларына каратылган шакырувы бойынша Ногай район Хатын-кызлар советининъ председатели Асият Манкаева тоьмендеги аьлде оьз ойлары ман боьлисти:

– Дагестаннынъ савлык саклав министерство етекшисининъ туьзилген авыр аьл мен байланыслы навасызланувы анълавлы эм бек дурыс. Дагестан аьли де коронавируслы маразынынъ уьшинши толкыныннан толысынша савланган йок, эм мине босагада – авырувдынъ доьртинши кеби. Республика яшавшылары арасында вакцинация иси осал юреди. Дагестаншылардынъ оьз ден савлыгына сондай вайымсызлыгы ман карайтаганлары мени аьжейипке калдырады. Юз процентке белгили болганлай, COVID-19 маразыннан вакцина прививка эттирген дагестаншыларды бу авырувдан саклады. Тек бир онлаган аьдемлер кайтадан сол инфекция ман авырдылар, ама заманында эттирген прививка аркасы ман сол маразды енъил оьткердилер. Вакцина тегин эм куьн узагында кайсы мезгилде де этиледи. Сонынъ уьшин, заман йоймай, эмлев пунктларга барып, вакцинация процедурасын оьтинъиз. Намысы осал медицина куллыкшыларыннан вакцинация акында сертификатлар сатып алманъыз. Аьли уьшин, мага белгили болганлай, сондай сертификатты бирев де сатып алмайды, неге десе коьбиси, ярым йыл озбай, олар кертисинше вакцинация процедурасын оьтип болмаякларын анъладылар.
Сыйлы дагестаншылар! Мен сизди, сонынъ ишинде Ногай районынынъ яшавшыларын да, неше кере де вакцинация оьтпеге шакырып, тилек салганман. Эм аьли де тилеймен: оьзинъиздинъ де, ювыкларынъыздынъ да яшав оьмирлери кыскартылмага болаяк кавыфлыгыннан аман сакланынъыз. Коронавируслы авырувга карсы турувда буьгуьнге тек вакцинация процедурасын оьтуьв бу кавыфлы авырувдан сакланув амалы болады.
Суьвретте: Асият Манкаева.