Язлык шактынъ басында, ер топырагы кепкен эм йылынган заманда, шегертки зыяншылар тувадылар, сонынъ уьшин алдын шалув шаралар коьрилмеге кереги аян.

Уьстимиздеги май айынынъ 12-де Дагестаннынъ сырт бетинде, аянлап айтканда, Кочубейдинъ коьшпели малшылык еринде, биринши шегерткилер барлыгы аян белгили болды. Йырмадан артык муниципалитетлер шегерткилер зыянын сезбеге болаяклар. Специалистлердинъ айтувы ман, зыяншылар 75 гектар ерди бийлемеге болады. Россельхозцентр куллыкшылары баьри муниципаллык туьзилислерге эм авыл хозяйстволык предприятиелер иелерине тийисли амаллар коьрмеге тилек салады. Олай деген, бу амаллар шегертки канагатланганша коьрилмеге керек.
Айтып озайык, 2022-нши йылдынъ 18-нши май куьнине Дагестан Республикасынынъ Ногай район еринде авыл хозяйстволык культураларга зыян келтирмеге болатаган шегертки зыяншыларынынъ йоклыгы белгили. Онынъ акында «Ногайский район» МР администрациясынынъ УСХ специалисти Сейдали Суюнов билдирди.
– Шегертки курт-кумырскалар ман куьрес юритуьв уьшин Ногай районында оперштаб туьзилген, сол зыяншылар ман куьрес юритуьв уьшин коьрилеек шаралар планы белгиленген. Солай ок куьн сайын Кочубей зонасы ман мониторинг юритиледи, – деди Сейдали Суюнов.