Уьстимиздеги йылдынъ курал айынынъ 5-нши куьнинде, Ногай районында, Уллы Енъуьвдинъ 77-нши йылына багысланган эм «Енъуьв байрагы» акциясы ишинде автоювырув йол алды.
Бу байрам шарасында Ногай районынынъ ямагат организацияларынынъ етекшилери – Ямагат палатасынынъ председатели Эльмурза Саитов, Афганшылар союзынынъ председатели Сталинбек Култаев, Ногай районы бойынша Чернобыльшилер союзынынъ председатели Руслан Кунтувганов, «Единая Россия» партия ваькили Амирхан Межитов, КПРФ ваькили Тахир Аракчиев, Ногай район администрациясындагы «Яслык» яслар орталыгынынъ куллыкшылары, Ногай район администрациясынынъ аькимбасынынъ орынбасары Баймагомед Ярлыкапов катнастылар.
Акция басланаяктан алдын шара катнасувшылары ман, оьлшемине коьре коьп уьйкен болмаган, митинг озгардылар. Сол шарады болса, Ногай район МР администрациясынынъ аькимбасынынъ борышын толтырувшы Хамидулла Саитов, бу акция Ногай районы бойынша Савытлы куьшлер эм ыхтыяр саклавшы органларынынъ Ветеранлар советининъ председатели Акманбет Сангишиевтинъ куьш салувы ман озгарылатаганын белгилеп кетти. Солай ок ол ызгы заманларда куьнбатар эллери Уллы Енъуьвдинъ маьнесин тоьменлетпеге суьетаганын да белгиледи.
– Сонынъ уьшин биз – Уллы Аталык согысынынъ баьтирлерининъ асабалары, атайларымыздынъ эткенин мутпага, боьтен де, соларга багысланган ийги аьдетлеримизди артка тасламага керек тувылмыз, – деди ол.
Оннан сонъ оьз соьзин Акманбет Сангишиев айтты:
– Йыл сайын бизим автоювырув озгарувымыздынъ бас мырады – Уллы Аталык согысында ян берген аталарымыздынъ, кардашларымыздынъ йигитлигин эскеруьв. Оннан баскалай, автоювырув РФ Президенти Владимир Путинди, Украина еринде болаятырган спецоперациясында катнасатаганларды колтыклав болады.
Бу йыл бизим акцияда тек ясуьйкенлер тувыл, «Яслык» яслар орталыгынынъ ваькиллери де ортакшылык этедилер. Сол уьйкен куьез, неге десе олар сондай шараларда катнасып, баьтирлеримиз бен танысадылар, – деди ол.
Соьзининъ арасында ол бу йыл Ногай районы немец шапкыншыларыннан босатылганлы 80 йыл толатаганын да белгиледи. Сога коьре, автоювырув немецлер болган баьри авылларга да бараягын да айтып кетти. Автоювырув уьш куьн узагында бардырылды, уьшинши, тамамлав куьнинде акция катнасувшылары согыс йылларында госпиталь болган Батыр-Мурза, Махач Дахадаев атындагы партизан отрядынынъ ставкасы болган Червленные Буруны эм Терекли-Мектеб авылларында 1942-нши йылда авиа ушувда ян берген аьскершилер коьмилген кардашлык камырынынъ касында болды.
