Курал айдынъ 12-нши куьнинде Савлайроссиялык медсестралар куьни белгиленди. Медициналык куллыкшылардынъ иси дуныяда маьнели эм керекли кеспилердинъ бириси деп саналады. Пандемия заманында олар оьз кайратлы куллыгы ман баьтирлигин коьрсеттилер. Кыйынлы заманда оьз кыйынын, керек болса, яшавын да аямай, медициналык сестралар коьплеген авырувлыларды оьлимнен куткарганлар.

Ногай район орталык больницасынынъ административли корпусында кеспи байрам ман байланыста ийги ислегени уьшин медсестраларга больница етекшилеви атыннан Сый грамоталар тапшырылды. Кутлав соьзин Ногай орталык больницадынъ бас врачы Фаризат Янибек кызы Межитова, онынъ орынбасарлары Зафира Эсманбет кызы Куруптурсунова эм Зульфия Муртузали кызы Шугаипова шыгып соьйледилер. Олар медициналык сестраларга ден савлык, аьеллеринде онъайлык, татымлык эм исинде уьстинликлер йорадылар.
Бизим хабаршы.
Суьвретте: медициналык сестраларды савгалаганнан сонъ.