Сав дуныядынъ баьри мусылманлары да Курман-байрамын байрамшылавга аьзирленедилер. «Инсан» саваплык фонды баьри де дин кардашларды сол байрам ман кутлайды. Аьр бир аьдемге эм уьйге ийман, тынышлык, ден савлык, наьсип эм мол берекет йорайды.

Соны ман бирге фонд Курман-байрамы алдында «Аьр бир мадарсыз аьлде яшайтаган уьйге – эт» деген йыл сайынлык акция озгарады.

Бу акциядынъ бас ниети – ол ислам дини бойынша Курманга аьзирленген малды шалмага эм Курман-байрамга деп шалынган малдынъ этин район ериндеги осал яшайтаганларга пайламага коьмек этуьв.

Курманга деп аьзирленген малды шалув аьдетин этер уьшин эм осал аьлде яшайтаганларга этти пайлав уьшин ниети бар аьдем купонды толтырып, сайланган малдынъ баасын тоьлемеге эм 8-928-505-56-77; 8-928-890-78-61; 8-929-227-60-30 телефон номерлери мен занъ сокпага керек болады.

Буьгуьн, 9-ншы сары тамбыз айында Терекли-Мектебтеги медресе янында бу акцияда катнаспага ниети бар яде Курман-байрамына оьзине соймага мал сатып алмага суьетаган аьдемлер уьшин койлар сатылаяк.

Шалаяк курманынъызды, этеек саваплыгынъызды Алла-Таала кабыл этсин эм баьримизге де берекет берсин!