Район бойынша вакцинация юритилип туры. Сол сорав бойынша билдируьвди Ногай район орталык больницасынынъ бас врачы Фаризат Межитова «Шоьл тавысы» республикалык газетасына берди. Онынъ айтувы ман, район яшавшылары коронавирустан вакцина алып турадылар. Солардынъ ишинде 60 ястан озганлар коьп, сол зат бизди суьйиндиреди. Коьплеген аьризелер авыллардан туьседилер, сога коьре медициналык куллыкшылар район авылларына бараяклар.

– Мен янъыларда Червленные Буруны авылында болдым, 15 вакцина медициналык куллыкшыларына деп аькеттим. Баьри вакциналар авыл яшавшыларына шыктажланды. Сол зат район яшавшылары пандемия заманында коьп затларды ойлаганын, анълаганын айтады. Кайдай коьп аьдемлер коронавирустан оьлгенлер, соны да мутпага ярамас. Яшавшылар оьз эркинлиги мен барадылар, – деп айтты больницадынъ бас врачы.
«Вакцинация пункты Кызыл муьйиске коьширилген, вакцина алмага суьйгенлер келмеге боладылар», – деп белгилейди ол. Яшавшылар вакцинация этуьв уьшин Госуслуги бойынша язылмага боладылар. Оьз шеретин район администрация, КЦСОН куллыкшылары, геологлар эм баска яшавшылар карап турылар.
Коькек айынынъ 7-нши куьнине Ногай районыннан 400 аьдем вакцинацияды алган.
– Бу куьнлерде Ногай орталык больницасында 10 аьдем внебольничная пневмониядан эмленедилер, олардынъ сырасында 1 бала да бар. Солай ок ызгы куьнлер районымызда эти кызып авырыганлардынъ саны да оьседи. Оьзинъиздинъ эм касынъыздагылардынъ ден савлыгын ойлап, прививкады заманында эттирмеге тийисли, – дейди Фаризат Межитова.