Бу куьннинъ белгиленуьв тарихин алып карасак, коьремиз, узактагы 1918-нши йылда каравыл комендатурасынынъ туьзилисинде биринши хозяйстволык боьлик туьзилгенин. Баслап боьликтинъ туьзилисинде доьрт кесек болган. Сол санда савыт-садак, аьскершилердинъ кийимлери, коьлик эм азык-туьлик яктан канагатлав боьликлер.
Бу куьн белгиленип басланганнан бери аз заманлар оьтпегенлер, хозяйстволык боьликлер де ис аьрекети яктан уьйкен оьрленуьвлер йолын оьткенлер. Бу куьнлерде иш ислер органларынынъ тыл канагатлав службалары айырым беркитилген хозяйстволык тармак болады. Ис аьрекет те тыпаклыкта юритиледи.
Ногай районы бойынша Россия ОМВД-сынынъ тыл боьлигинде ис аьрекеттинъ кайтип юретаганы, олар алдына салынган борышлар эм коьп баска затлар акында Ногай районы бойынша Россия МВД боьлигининъ тыл службасынынъ етекшиси иш ислер службасынынъ майоры Алик Эльгайтарович Кургановка хабарламага тилек салдык.

– Алик Эльгайтарович, МВД тыл боьлиги алдында кайдай борышлар бар?
– Тыл службасынынъ министерствосы оьзининъ коьп йыллык аьрекети бойынша уьйкен оьрленуьв йолын оьткен. Коьп кере оьзининъ атын да авыстырган. Бу куьнлерде Россия МВД-сынынъ иш ислер органларынынъ тыл боьликлери алдында полиция куллыкшылары тийисли аьлде оьзлерининъ оперативли-службалык, аьскершилик исин толтырувга керекли затлар ман канагатлав борышлары турадылар.
– Биз билип, Россия МВД боьликлеринде айырым эс савыт-садакты, специальли аьскершилик коьликлерди саклавга, солардынъ аьскершилик-службалык борышларды толтырувга аьзирлигине береди. Ногай районы бойынша Россия МВД боьлигинде сол яктан аьллер кайдай?
– Оьзек те, бизде де сога уьйкен маьне бериледи эм ислер де юритиледилер. Тамамларды тийисли аьлге аькелер уьшин, буьгуьнлерде маьнели туьрленислер этилинедилер: янъы технологиялар киритиледилер, етекшилев аьрекети автоматизироваться этилинеди, склад ишиндеги инфраструктура оьрленип турады. Ведомстводынъ туьзилген эм беркитилген заманларыннан алып карасак, Россия Федерациясынынъ иш ислер органларынынъ байыр туьзилисининъ аьрекетин ийги юритуьвге шартлар туьзуьв бизим боьликтинъ бас приоритети болады.
– Эгер мысал уьшин ызгы эки йылды алып карасак, Ногай районы бойынша Россия ОМВД-сынынъ тыл службасы ман кайдай куллыклар этилгени акында хабарланъызтагы.
– Ызгы эки йыл ишинде аз куллыклар этилинмеди, полиция автопаркы толысынша янъылландырылды. Ногай районынынъ орталыгы Терекли-Мектебте, кишкей болмаган авылларынынъ бириси Карагастынъ орамларында янъы УАЗ маркалы автокоьликлер патруль службасын юритедилер. Солай ок, баьри патруль службалары заманга келисли янъы байланыс амалламалары ман, тергев эм видеофиксация тармаклары ман канагатланганлар. Службалык борышларды сапатлы толтырув уьшин баьри керекли алатлар ман «Солнечный» КПП-2д административли боьлиги янъыдан курылып, ярастырылган. Ногай районы бойынша Россия МВД боьлигинде баьри кабинетлерде де ярастырув ислер озгарылдылар. Бек уьйкен маьне бухгалтерский эсапты автоматизациялавга бериледи. Бизим боьлик пен документлердинъ айланувы да автоматизацияланган, соны ман байланыслы болып, ис орынлар да туьзилгенлер.
– Ногай районы бойынша Россия МВД-сынынъ тыл боьлигининъ оьрленуьвине оьз косымын эткен ветеранлар акында да бир-эки авыз соьз айтып кетинъиз.
– Мен тыл боьлигинде стажировка оьткен заманларда, боьликти Мурзахан Надирович Сеитов етекшилейтаган эди. Ол меним эсимде – бир де арымайтаган, талмайтаган, аьр куллыгын заманы ман толтырып болатаган аьдем болып калган. Солай ок, боьликти етекшилеген Аскерхан Зейнадинович Межитовты белгилемей болмайман. Онынъ баславы ман мен бу боьликте ис сырларына уьйренгенмен.
Шадиев Мурат Юмадуевич, онынъ кол астында мага ислемеге туьскен. Мурат Юмадуевич Ногай районы бойынша Россия МВД-сынынъ тыл боьлигининъ оьрленуьвине оьзининъ коьп уьлисин коскан. Боьликтинъ административли меканында ярастырув куллыкларды уйгынлап озгарган. Ол дайым да: «Бизим этетаган куллыгымыз, биринши караска, коьринмейди, ама бизим кереклигимиз аян белгили. Айтпага, автокоьлик сынганда, кагыт кутылганда, узак кетпеге керек тувыл, лампочка янса да, бизим служба керек болады», – дейтаган эди.
Аьли тыл службасын етекшилей келип, мен Мурат Шадиевтинъ соьзлерин эсиме аламан эм онынъ айтканлары акыйкат экен деп ойлайман.
– Россия Федерациясынынъ иш ислер органларынынъ материал-техникалык эм хозяйстволык канагатлав боьликлерининъ туьзилген куьни белгиленеек заманда сиз, Алик Эльгайтарович, оьзинъиздинъ акында хабарлап кетинъизтагы.
– Мен Шешен-Ингуш АССР-нынъ Шелковской районынынъ Воскресеновское станицасында 1976-ншы йылдынъ увыт айынынъ 28-нши куьнинде тувганман. Балалыгым да, яслыгым да Ногай районынынъ Кумлы авылында оьтти. Мектебтен сонъ, Карашай-Шеркеш технологиялык институтын окып битирдим. Сонъ аьскер сырасында эр борышымды толтырдым. Шешен Республикасында болып озган контртеррористлик операциясында да катнастым. Соннан тайып, бир ойланмай, Ногай районы бойынша Россия МВД боьлигине ислемеге келдим. Мен ис аьрекет баслайтаган заманда, МВД тармагында аьрекетти бардырув онъайлы деп саналатаган эди, тенълеримнинъ коьбиси де бу тармакта ислейтаган эдилер. Мен мунда 2000-ншы йылда келдим, оьткен йырма йыл ишинде ОМВД-дынъ ППСП милиционери болдым, ызгы эки йыл Ногай район ОМВД-сынынъ тыл начальниги болып ислеймен. Соьйтип, ис аьрекет те юреди, заман да кете береди.
– Сол тыныш болмаган ис аьрекетинъиз тек оьрге барып, уьстинликлер аькелсин. Бизге айырган заманынъыз уьшин савболынъыз. Алдыда ер юзинде тек тынышлык болсын!
Заман. Бизден сорамастан эм бизге карамастан озады. Оьзининъ ис аьрекетин Алик Эльгайтар увылы Курганов ис йолдаслары арасында, оьзине тапшырылган ис аьрекетти тек оьрлендируьвге багыслап йолыгады.
Хабарласувды Г.Сагиндикова юриткен.
Суьвретте: А.Курганов.