Суьвретте яс оьспирди коьремиз. Онынъ аты Курман Исакаев болады. Ама коьплер ол йигитлик коьрсеткен яс экенин билмейдилер. Йигит деген атты ол тийисли казанган эм йигерли яс пан сол ат дайымга калаяк.

Бу оьзгерис янъыларда, бу йылдынъ шилле айынынъ басында, ХМАО-дагы Сургут районынынъ Федоровский авылында болды. Исси куьнлерининъ бирисинде яс оьзининъ ювыклары ман коьлге шомылмага барады. Яздынъ исси мезгили болган саялы, коьл ягасы коьп аьдемлерге толган эди. Курман турган ерден алыс болмай, кызлар шомылган болган. Кишкей заман оьткен сонъ, кызлар шомылатаган беттен ярдамга шакыратаган кышкырыклар эситилип баслайды. Тоьгеректе шомылган аьдемлер, алыс болмаган ерде сув ишиндеги кызлар маскаралайтаган боларлар деп, ойлап, кыздынъ сувга кетуьвине карап турганлар. Ягада болган Курман сувда ийги ялдап болмавына да карамай, ойланмай сувга атылады. Кызга дейим ялдап етип, ютылып баратаган кыздынъ колларыннан ыслап, коьлдинъ ягасына шыгарады. Ягада оны корккан ата-аналар эм оьзгеристи коьзи мен коьрген аьдемлер карап туры эдилер. Йыйылган аьдемлер кызга оьзине келмеге ярдамластылар.

Мактаншак деген касиетинде болмаган Курман бу оьзгерис акында коьп айтпага суьймейди. Онынъ айтувы ман, аьр ким де онынъ орынында соьйтип этпеге тийисли эди. Бизим борышымыз болса, Курманнынъ йигитлиги баьрисине де уьлги болатаганы, биз оны ман оьктемсийтаганымыз акында айтув болады.

14 ясындагы Курман Федоровский авылынынъ 5-нши номерли орта мектебинде окыйды. Кобаншы тукымыннан болган ястынъ тувган ери Ногай районынынъ Нариман авылы болады. Курман спорттынъ эркин куьрес кеби мен кызыксынады. Келеекте МЧС тармагында аьрекет этпеге мырады бар. Келеекте ол аьдемлерге ярдам эм пайда аькелеек тийисли куллыкшы болаягына сенемиз. Сол затты ол буьгуьнлерде коьрсетип туры. Куткарувдан сонъ сенде кайдай сезимлер тувды, деген соравга ол, сондай аьлде карап турмай, ярдамласпага керек эдим, дейди.

Соьйтип оьз яшавы кавыфлы аьлинде болганына да карамай, окувшы яс эткен йигитлиги мен кызды оьлимнен куткарды. Баскадынъ яшавын куткармага деп, энъ баалы заты – яшавы ман курманлык этпеге аьзир эди! Курманга сол йигитлиги уьшин уьйкен ра- зылык! Оны соьйтип тербиялаган ата-анага савбол айтамыз.
Ол баьримизге де энъ коьримли уьлги эм шынты йигит болады.

Радмир Нуралиев,
Сургут каласындагы ногай яслар союзынынъ агзасы.